Monday, 11 December 2017

டிரம்பை பல முனைகளில் சுற்றி வளைக்கும் முல்லரின் சிறப்பு விசாரணை

2016-ம் ஆண்டு நவம்பரில் நடந்த அதிபர் தேர்தலின் போது டிரம்பின் பரப்புரைக் குழுவைச் சேர்ந்த பலர் இரசிய உளவுத் துறையுடன் தொடர்பில் இருக்கின்றார்கள் என்ற குற்றச்சாட்டு தேர்தலில் டிரம்ப் வெற்றி பெற முன்னரே முன் வைக்கப்பட்டது. டிரம்ப் அதிபராகப் பதவி ஏற்ற போது சட்டமா அதிபராக இருந்த சலி கேற் டிரம்பின் தேர்தல் பரப்புரைக் குழுவில் இருந்த மைக்கேல் ஃபிளைனை அமெரிக்கப் படைத் தளபதியாக நியமிக்க வேண்டாம் எனத் தெரிவித்திருந்தார். மைக்கேல் ஃபிளைன் இரசிய உளவுத்துறையுடன் தொடர்பில் இருந்த படியால் இரசியா அவரை பயமுறுத்தி அமெரிக்கப் பாதுகாப்புக்கு குந்தகம் விளைவிக்கலாம் என்பது சலி கேற்றின் கருத்து. பின்னர் சலி கேற்றை தனது குடிவரவுக் கொள்கைக்கு நீதிமன்றத்தில் ஆதரவு வழங்க மறுத்ததால் டிரம்ப் பதவி நீக்கம் செய்தார். அதிபர் பதவிக் கையளிப்பின் போது மைக்கேல் ஃபிளைன் இரசியாவுடன் தொடர்பு வைத்திருந்தது மட்டுமல்ல துருக்கியிடமிருந்து பணம் பெற்றுக் கொண்டு துருக்கிக்காக அமெரிக்க பாராளமன்றத்தில் பரப்புரையாளராகச் செயற்பட்டார் என்பதையும் ஒபாமா டிரம்ப்பிடம் தெரிவித்திருதார். 2017 ஜனவரி 6-ம் திகதி அமெரிக்க அதிபர் தேர்தலில் இரசியா தலையிட்டதாக அமெரிக்க உளவுத்துறை கூறியது. அமெரிக்காவின் உள்நாட்டுப் பாதுகாப்பிற்கான உளவுத்துறை FBI என அழைக்கப்படும். இது அமெரிக்க நீதித்துறையின் கீழ் செயற்படுகின்றது.
குற்றப்பத்திரிகை
அமெரிக்க அதிபர் டொனால்ட் டிரம்பின் தேர்தல் பரப்புரைக் குழுவில் இருந்தவரும் அவர் தேர்தலில் வெற்றி பெற்ற பின்னர் அவரது அரசில் தேசிய பாதுகாப்பு ஆலோசகராகக் கடமையாற்றியவருமான மைக்கேல் ஃபிளைன் மீது சுமத்தப் பட்ட குற்றச் சாட்டை அவர் ஏற்றுக் கொண்டுள்ளார். அமெரிக்க அதிபர் தேர்தலில் இரசியா தலையிட்டு தேர்தல் முடிவுகளை மாற்றியமைத்ததா என்பதைப் பற்றி விசாரணை செய்து கொண்டிருக்கும் சிறப்பு விசாரணையாளர் ரொபேர்ட் முல்லர் தான் குற்றப் பத்திரிகையைல் மைக்கேல் ஃபிளனுக்கு எதிராகத் தாக்கல் செய்துள்ளார். இவை டிரம்பின் தேர்தலில் பரப்புரை செய்தமை பற்றியும் அவரது தேர்தல் வெற்றி பற்றியும் தேர்தலில் வென்ற பின்னர் அவரது செயலர்களும் (அமைச்சர்களும்) அதிகாரிகளும் நடந்து கொண்ட விதங்கள் பற்றி பல விசாரணைகள் நடக்கின்றன. ரொபேர்ட் முல்லர் டிரம்பின் மீது நம்பிக்கை வைத்துள்ளதும் அவருக்குப் பல கடன்களை வழங்கியதுமான டொயிற்ச் வங்கி தனக்கு தகவல்கள் வழங்கும் நீதிமன்ற ஆணையைப் பெற்றுள்ளார். இது டிரம்பிற்கும் அவருடன் இணைந்து செயற்பட்டவர்களுக்கும் ஒரு பேரிடியாக அமைந்துள்ளது. ஏற்கனவே பேஸ்புக் நிறுவனத்திற்கு எதிராகவும் நீதிமன்ற ஆணையை முல்லர் பெற்றுள்ளார். முல்லர் பல திசைகளிலும் பல முனைகளிலும் தனது விசாரணையைக் கவனமாகவும் ஓர் இறுதித் திட்டத்துடனும் காய்களை நகர்த்துகின்றார் என்பதைச் சுட்டிக் காட்டுகின்றது. தொடர்ந்து பல வெடிகள் முல்லரால் வெடிக்கப்படவிருகின்றது.
குற்றவாளிகளும் சுற்றவாளிகளும்
ரொபேர்ட் முல்லர் ஏற்கனவே(2017-10-30) டிரம்பினுடைய தேர்தல் பரப்புரைக்குழுவின் தலைவர் போல் மனஃபோர்ட்டிற்கும் தேர்தல் பரப்புரைக் குழுவின் உறுப்பினர் ரிக் கேட்ஸ், அதே குழுவில் வெளியுறவுத் துறை ஆலோசகராக இருந்த ஜோர்ஜ் பப்படொபௌலஸ் (George Papadopoulos) ஆகியோர் மீது குற்றப் பத்திரிகைக்கள் தாக்கல் செய்திருந்தார். அதில் முதல் இருவரும் தாம் சுற்றவாளி எனத் தெரிவிக்க ஜோர்ஜ் பப்படொபௌலஸ் தான் குற்றவாளி என்பதை ஏற்றுக் கொண்டிருந்தார். அந்த வகையில் 2017 டிசம்பர் 6-ம் திகதிவரை ரொபேர்ட் முல்லர் டிரம்ப்பின் தேர்தல் பரப்புரைக் குழுவில் இருந்தவர்களில் நான்கு பேர் மீது குற்றம் சுமத்தி உள்ளர். அதில் இருவர் தாம் சுற்றவாளிகள் எனவும் இருவர் தாம் குற்றவாளிகள் எனவும் தெரிவித்துள்ளனர். இதில் மைக்கே ல் ஃபிளைன் டிரம்பின் அரசில் முக்கிய பதவியான தேசிய பாதுகாப்பு ஆலோசகராகப் பதவி வகித்தவர்.
நிலைமாற்று காலம் என்னும் திருகுதாளக் காலம்
2016 ஜூன் மாதம் டொனால்ட் டிரம்ப் தன்னை அமெரிக்க அதிபர் வேட்பாளராக முறைப்படி அறிவித்தார். 2016 நவம்பர் 8-ம் திகதி அமெரிக்க அதிபர் தேர்தல் நடந்தது, டிரம்ப் வெற்றி பெற்ற டிரம்ப் 2016 ஜனவரி 20-ம் திகதி பதவி ஏற்றுக் கொண்டார். தேர்தல் முடிவு அறிவிக்கப்பட்ட திகதியில் இருந்து பதவி ஏற்கும் வரையிலான காலம் நிலைமாற்று காலம் என அழைக்கப்படும். அக்காலத்தில் நியமிக்கப்படும் அமைச்சர்களும்( செயலர்கள்) அதிகாரிகளும் நிலைமாற்றுகால அதிகாரிகள் எனப்படும். டிரம்பின் நிலைமாற்றுகாலப் பகுதிக்குப் பொறுப்பாக துணை அதிபர் மைக்கே பென்ஸ் நியமிக்கப்பட்டிருந்தார். அக்காலத்தில் பல நடவடிக்கைக்களை டொனால்ட் டிரம்பின் மகளின் கணவரான ஜரெட் குஷ்ணர் முன்னின்று நடத்தினார். டிரம்பின் மகன் டிரம்ப் ஜூனியரும் தேர்தல் பரப்புரையின் போதும் நிலைமாற்றுக் காலத்தின் போதும் பல நடவடிக்கைகளில் ஈடுபட்டிருந்தார். பல இரசியர்களுடனும் விக்கிலீக்ஸ் ஜூலியான் அசாஞ்சேயுடனும் அவர் செய்த தொடர்பாடல்கள் பற்றிய விசாரணைகள் நடந்து கொண்டிருக்கின்றன.
மாட்டுப்பட்ட மருமகன்
தேர்தலில் வென்ற பின்னர் 2016 டிசெம்பரில் டிரம்ப் அவர் தனது அரசில் இடம் பெறப் போகின்றவர்களை அறிவித்தார், அந்த நிலைமாற்றுகால நிர்வாகத்தில் மைக்கேல் ஃபிளைன் தேசிய பாதுகாப்பு ஆலோசகராக உள்ளடக்கபட்டிருந்தார். மைக்கேல் ஃபிளைன் 2016 டிசம்பரில் அமெரிக்காவிற்கான இரசியத் தூதுவருடன் இரசியாவிற்கு எதிராக உக்ரேன் விவகாரம் தொடர்பாக விதிக்கப்பட்டிருந்த பொருளாதாரத் தடைகளை நீக்குவது பற்றி உரையாடியிருந்தார். அது ஒரு பாரிய சட்ட விரோதமாகும். அமெரிக்க வெளியுறவுத் துறையின் அதிகாரிகள் தவிர வேறு எந்த அமெரிக்கக் குடிமகனும் அமெரிக்காவின் வெளிநாட்டுக் கொள்கை தொடர்பாக வெளிநாட்டுப் பிரதிநிதிகளுடனோ அல்லது அதிகாரிகளுடனோ கலந்துரையாட முடியாது. 2016 நவம்பரில் நடந்த அமெரிக்க அதிபர் தேர்தலில் இரசியத் தலையீடு தொடர்பான விசாரணையில் மைக்கேல் ஃபிளைனின் ஏற்படுத்திய திருப்பத்தால் பெரிதும் பாதிக்கப்படப் போபவராக டொனால்ட் டிரம்பில் மருமகன் ஜரெட் குஷ்ணரே கருதப்படுகின்றார். நிலைமாற்றுகால அதிகாரிகளில் அவரே முக்கியமானவராவார். அமெரிக்க அதிபர் தேர்தலில் பின்னர் டிரம்பின் மருமகன் Jared Kushner வாஷிங்டனுக்கான இரசியத்தூதுவரிடம் மொஸ்க்கோவிற்கும் தமக்கும் இடையில் ஒரு தனிப்பட்ட இரகசியமான தொடர்பாடல் முறைமையை உருவாக்க வேண்டும் என்று கேட்டுக் கொண்டார். இந்தத் தகவலை அந்தத் தூதுவர் மொஸ்க்கோவில் உள்ள வெளியுறவுத்துறைக்கு தெரிவித்தார். அந்தத் தொடர்பாடல் அமெரிக்க உளவுத்துறையால் ஒற்றுக் கேட்கப்பட்டுள்ளது. மைக்கேல் ஃபிளைனை இரசியாவுடன் தொடர்புகளை ஏற்படுத்தும் படி பணித்தவர் மருமகன் குஷ்ணர் எனச் சொல்லப்படுகின்றது. மைக்கேல் ஃபிளைன் அதை தனது வாக்குமூலத்தில் தெரிவித்திருந்தா, அது டிர்ம்பிற்கு பெரும் சிக்கலை உருவாக்கலாம். சிறப்பு விசாரணையாளர் ரொபேர்ட் முல்லர் மைக்கே ஃபிளைன் மீது சுமத்த ஒரு நீண்ட குற்றப்படியலை வைத்துள்ளார். அதில் பணச்சலவை, வரி ஏய்ப்பு, பொய்யான வாக்குமூலம் என்பவை அடங்கும். இவை அமெரிக்க அதிபர் தேர்தலில் இரசியத் தலையீட்டுடன் நேரடித் தொடர்புடையவை அல்ல. அமெரிக்க நீதித்துறையில் ஒரு குற்றவாளி இன்னொரு குற்றவாளி செய்த குற்றங்கள் தொடர்பான தகவல்களையும் சாட்சியங்களையும் சமர்ப்பித்தால் அக்குற்றவாளிக்கு எதிரான தண்டனை குறைக்கப்படும். அந்த வகையில் இனி மைக்கேல் ஃபிளைன் ரொபேர்ட் முல்லருக்கு வழங்கவிருக்கும் சாட்சியங்கள் இரசியாவின் தலையீடு தொடர்பாக டிரம்பையும் அவரது மகன் மருமகன் ஆகியோரையும் குற்றவாளிகளாக சட்டத்தின் முன் நிறுத்த வழி வகுக்கலாம்.

ஜேம்ஸ் கொமிஎஃப்பிஐ இயக்குனர் பதவியிலிருந்து நீக்கம்
டிரம்ப் பதவிக்கு வந்த நாளில் இருந்து அமெரிக்க நீதித் துறையையும் அதன் உளவுத் துறையான எஃப்பிஐயையும் நாளொரு அறிக்கையாலும் பொழுதொரு டுவிட்டாலும் தாக்கி வருகின்றார். முன்னால் எஃப்பிஐ இயக்குனர்களான ஜேம்ஸ் கொமியும் ரொபேர்ட் முல்லரும் டிரம்பால் கடுமையான வார்த்தைகளால் விமர்சிக்கப்படுகின்றனர். அதன் தலைமை இயக்குனரான ஜேம்ஸ் கொமி டிரம்ப் பதவி ஏற்க முன்னரே டிரம்பினது பரப்புரைக்குழுவிற்கும் இரசிய உளவுத் துறைக்கும் தொடர்புகள் இருந்ததா என்பதைப் பற்றி ஆராயத் தொடங்கினார் . மைக்கேல் ஃபிளைன் மீதான குற்றச்சாட்டுக்கள் பல ஊடகங்களில் அடிபட டிரம்ப் மைக்கேல் ஃபிளைனை பதவியில் இருந்து நீக்க வேண்டியதாயிற்று. பின்னர் டிரம்ப் ஜேம்ஸ் கொமியுடன் தனிப்பட்ட முறையில் தொடர்பு கொண்டு மைக்கேல் ஃபிளைன் நல்லவரென்று சொல்லி அவர் மீதான விசார்னையை  விடும்படி கேட்டுக் கொண்டார்டிரம்பின் அணுகு முறை சரியல்ல எனச் சுட்டிக்காட்டிய ஜேம்ஸ் கொமி நீதித் துறையூடாக தன்னை அணுக வேண்டும் எனக் கேட்டுக் கொண்டார். இன்னும் ஒரு சந்தர்ப்பத்தில் ஜேம்ஸ் கொமியை விருந்து அழைத்த டிரம்ப் தன்க்கு எதிராக கொமி எந்த விசாரணையும் செய்யவில்லை என ஒரு பகிரங்க அறிக்கை விடும்படி வேண்டியதுடன் தனக்கு ஆதரவாக செயற்படுவதாக ஒரு உறுதி மொழி வழங்கும் படியும் கேட்டுக் கொண்டார். இவற்றுக்கெல்லாம் ஜேம்ஸ் கொமி மறுத்த நிலையில் டிரம்ப் அவரைப் பதையில் இருந்து நீக்கினார். இது கடுமையான விமர்சனத்துக்கு உள்ளாகியது. அதன் விளைவாகவே அமெரிக்க சட்டமா அதிபர் திணைக்களம் சிறப்பு விசாரணையாலராக ரெபேர்ட் முல்லரை நியமிக்க நிர்ப்பந்திக்கப்பட்டது. 2001-ம் ஆண்டில் இருந்து 2013 வரை எஃப்பிஐ இயக்குனராக இருந்தவர் ரொபேர்ட் முல்லர். அவரைத் தொடர்ந்து அந்தப் பதவியில் ஜேம்ஸ் கொமி அப்பதவியை வகித்தார். 2017 மே மாதம் நீக்கப்படும் வரை டிரம்பால் பதவி நீக்கம் செய்யப்படும் வரை அவர் அப்பதவியில் இருந்தார். முல்லரும் கொமியும் இடதுசாரித் தன்மை கொண்ட தாராண்மைவாதிகள் எனவும் எஃப்பிஐ அரசியல் மயமாக்கப்பட்டு விட்டது எனவும் அமெரிக்காவின் பழமைவாதிகள் குற்றம் சாட்டுகின்றனர்.

பதிவி நீக்கமும் மறு தேர்தலும்.
அமெரிக்க அரசியலமைப்பின் படி அதிபரைப் பதவி நீக்கம் செய்வதற்கான விசாரணை உரிமை பாராளமன்றத்தின் மூதவைக்கும் பதவி நீக்கும் உரிமை மக்களவைக்கும் உள்ளது. முதலில் பதவி நீக்கம் செய்யும் முன்மொழிவு மக்களவையில் நிறைவேற்றப்பட வேண்டும். பின்னர் மூதவையில் உச்ச நீதிமன்றத்தின் தலைமை நீதிபதியின் முன்னர் மக்களவை வழக்காளியாகவும் அதிபர் குற்றம் சுமத்தப்பட்டவராகவும் விசாரணை செய்யப்படும். அதைத் தொடர்ந்து மூதவை வாக்கெடுப்பில் மூன்றில் இரண்டு பெரும்பான்மை அதிபரைக் குற்றவாளியாகக் காணும் போது அவர் பதவி நீக்கம் செய்யப்படுவார். துணை அதிபர் பதவி ஏற்பார். ஆனால் டிரம்ப் விவகாரத்தில் தேர்தலின் போது டிரம்பின் பரப்புரையாளர்கள் இரசியாவுடன் இணைந்து தேர்தல் முடிவை தமக்கு சாதகமாக மாற்றினார்கள் என்ற குற்றம் நிரூபிக்கப்பட்டால். தேர்தலை செல்லுபடியற்றதாக்கலாம். தேர்தலைச் செல்லுபடையற்றதாக்கும் அதிகாரம் உச்ச நீதிமன்றத்திடம் இருக்கின்றது. மைக்கேல் ஃபிளைன் தான் குற்றவாளி எனத் தெரிவித்தவுடன் அமெரிக்காவின் பங்குச் சந்தை வீழ்ச்சியடைந்தது. டிரம்ப் பதவி நீக்கம் செய்யபப்பட்டு தேர்தல் செல்லுபடியற்றதாக்கப்பட்டு இடையில் ஒரு தேர்தல் வரலாம் என்ற எதிர்பார்ப்பாலே பங்கு விலைகள் வீழ்ச்சியடைந்தன என்றார்கள் நிதித்துறை ஆய்வாளர்கள். ஆனால் டிரம்பை பதவி நீக்கம் செய்வதற்கு மூதவையில் மூன்றில் இரண்டு பங்கு பெரும்பான்மை உறுப்பினர்களின் ஆதரவு கிடைக்குமா என்பது ஐயத்திற்கு இடமானது. மோசமான பல முறைகேடுகளில் டிரம்ப் ஈடுபட்டார் என்பது அம்பலமானால் மட்டுமே சில குடியரசுக் கட்சி மூதவை உறுப்பினர்கள் மனம் மாறி வாக்களிக்கலாம். குடிவரவிற்கு எதிரான டிரம்பினது நிலைப்பாடும் அவர் பாராளமன்றத்தில் நிறைவேற்றிய வருமான வரிச் சட்டமும் அவரது குடியரசுக் கட்சியினர் மத்தியில் அவரது செல்வாக்கை உயர்த்தியுள்ளன. 

Friday, 8 December 2017

வட கொரியாவிற்கு எதிராக நுண்ணலை ஏவுகணைகள் (Microwave Missiles) பாவிக்கப்படுமா?

வட கொரியாவின் ஏவுகணைப் பரிசோதனைகளைத் தடுக்க அமெரிக்காவில் புதிதாகத் தயாரிக்கப்பட்ட நுண்ணலை ஏவுகணைகள் (Microwave Missiles) பாவிக்கப்படுமா என்ற கேள்வி பரவலாக எழுந்துள்ளது. நுண்ணலைகள் படும் பொருட்களின் மூலக்கூறுகள் விரைவாக ஒன்றன் மீது ஒன்று உரசப்படும். அப்போது அதில் வெப்பம் பிறக்கும். எமது வீடுகளில் இதனால் உணவுகளைச் சூடாக்குகின்றோம். இது பாரிய அளவில் செயற்படுத்தும் போது எதிரி இலக்குகளை பொரித்துக் கருக்கிவிடும்.



வட கொரியா ஏவுகணைகளை வீசுத் தயாராகும் போது அந்த இடங்கள் செய்மதி மூலம் அவதானிக்கப்படும். அத்தகவல்களை விமானப் படைத்தளங்களுக்கு அனுப்படும். விமானத் தளங்களில் இருந்து B-52 போர் விமானங்கள் அந்த இடத்துக்கு மேலாகச் சென்று Boeing AGM-86B என்னும் சீர்வேக (Cruise) நுண்ணலை ஏவுகணைகளை வீசும். அது உருவாக்கும் நுண்ணலைகள் இலக்கில் உள்ள கணினிகளையும்  செயலிழக்கச் செய்யும். ஆனால் அங்குள்ள மக்களுக்கோ அல்லது கட்டிடத்திற்கோ எந்த சேதமும் ஏற்படாது. இதனால் இது அழிவில்லாத படைக்கலன் என அழைக்கப்படுகின்றது.



வட கொரியா இன்னும் அசையும் பார ஊர்திகளில் இருந்து ஏவுகணைகளை ஏவத் தொடங்கவில்லை. பார ஊர்திகளில் இருந்து ஏவுகணைகளை வட கொரியா ஏவ விரைவில் தொடங்கலாம். உருமாற்றம் செய்யப்பட்ட பார ஊர்திகளில் இருந்து வட கொரியா ஏவுகணைகளை ஏவுவதை அமெரிக்க செய்மதிகளால் கண்டு பிடிக்க முடியாமல் போகும். அத்துடன் துரிதமாகச் செயற்பட்டு பார ஊர்திகளில் இருந்து ஏவும் போது அமெரிகாவின் B-52 அங்கு செல்வதற்கான கால அவகாசம் கிடைக்காமல் போகலாம்.

வட கொரியாவில் பூகோள அமைப்பு பல சிறியதும் பெரியதுமான மலைத் தொடர்கள் நிறைந்தது. குறுகிய பள்ளத்தாக்குகள் நிறைய உண்டு. அவற்றுக்குள் தனது ஏவுகணை வீசு நிலையங்களை மறைத்து வைத்திருக்கலாம். அமெரிக்கா நுண்ணலை ஏவுகணைகளைப் வட கொரியாவிற்கு எதிராகப் பாவிக்கத் தொடங்கிய பின்னரும் ஏவுகணைப் பரிசோதனை தொடர்ந்தால் அது அமெரிக்கவிற்கு பெரும் அவமானகரமானதாக அமையும்.
தனது ஏவுகணைப் பரிசோதனைக்கு எதிரான நுண்ணலைத் தாக்குதலை வட கொரியா ஒரு போர் நடவடிக்கையாகப் பிரகடனப் படுத்தலாம். பதிலடியாக தென் கொரியத் தலைநகரைத் துவம்சம் செய்யும் எறிகணை வீச்சுக்களைச் செய்யலாம்.

Monday, 4 December 2017

சிக்கல் என்றால் அது மேற்காசியா

அரபுக்கள், ஈரானியர்கள், துருக்கியினர், யூதர்கள், குர்திஷ்கள் எனப் பலதரப்பட்ட இனங்கள் ஆயிரக்கணக்கான இனக் குழுமங்கள் போன்றவற்றை கொண்ட இயற்கை வளம் மிக்க மேற்காசியாவில் மன்னராட்சி, மக்களாட்சி, மதவாத ஆட்சி, தன்னதிகாரிகளின் ஆட்சி எனப் பலவிதமான ஆட்சிகள் இருப்பதால் அங்கு சிக்கல்களுக்கு குறைவில்லை. பிராந்திய வல்லரசுகளுக்கு இடையிலும் உலக வல்லரசுகளுக்கும் இடையிலான போட்டி அந்த சிக்கல்களை மேலும் மோசமாக்குகின்றது.

அகலக் கால் வைக்கும் இரசியா
சிரியா, ஈராக், யேமன் ஆகிய நாடுகளின் உள்நாட்டுப் போரும் கட்டாருக்கும் மற்றைய வளைகுடா நாடுகளுக்கும் ஏற்பட்ட முறுகல் நிலையும் இரசியாவின் மேற்காசிய ஆதிக்கத்திற்கு வாய்ப்பாக அமைந்தன. எரிபொருளில் தன்னிறைவடைவதும் இஸ்ரேலின் பாதுகாப்பு அசைக்க முடியாத நிலையில் இருப்பதாலும் ஐக்கிய அமெரிக்கா மேற்காசியாவிலும் வட ஆபிரிக்காவிலும் தனது கவனத்தை குறைக்க முடிவெடுத்து. அது இரசியா அப்பிராந்தியத்தில் தனது பிடியை இறுக்க ஏதுவாக அமைந்துள்ளன. சிரியாவில் போர் நிறுத்தத்தைக் கொண்டு வருவதற்காக கஜகஸ்த்தான் தலைநகர் அஸ்டானாவில் 2015 மே மாதத்தில் இருந்து ஒரு பேச்சுவார்த்தை இரசியாவின் ஏற்பாட்டின் பேரில் நடக்கத் தொடங்கியது. அமெரிக்கா ஏற்பாடு செய்த ஜெனீவாப் பேச்சு வார்த்தைக்கு மாற்றாக இது ஏற்பாடு செய்யப்பட்டது. 2016 டிசம்பரில் சிரியாவில் இரசியா தன்னை ஒரு பிரச்சனை தீர்க்கும் நடுவராக முன்னிறுத்தியது.

இரசியா கைவிட முடியாத சிரியா
சிரிய உள்நாட்டுப் போரின் இறுதிக் கட்டத்தில் அங்கு ஒரு ஆட்சி உருவாக்குபவராக (King Maker) திகழ இரசியா பெரிதும் விரும்புகின்றது. சிரிய அதிபர் பஷார் அல் அசாத்தின் ஆட்சியைக் காப்பாற்ற ஹிஸ்புல்லா அமைப்பை போராட வைத்ததுடன் பல நாடுகளில் இருந்து போராளிகளைத் திரட்டி சிரியாவிற்கு அனுப்பியது ஈரான். போர் முடிந்த சிரியாவிலும் தனது ஆதரவுப் படைகள் தொடர்ந்து நிலை கொண்டிருக்க வேண்டும் என ஈரான் விரும்புகின்றது. அதாவது லெபனானில் ஹிஸ்புல்லா அமைப்பின் மூலம் தனது பிடியை ஈரான் இறுக்கி வைத்திருப்பது போல சிரியாவிலும் செய்ய ஈரான் திட்டமிட்டுள்ளது.

சிரியாவைக் கைப்பற்றத் துடிக்கும் ஈரான்
இரசிய நகர் சொச்சியில் நடந்த சிரிய சமாதானப் பேச்சு வார்த்தையில் ஈரானும், இரசியாவும் துருக்கியும் சிரியாவின் பிராந்திய ஒருமைப்பாட்டைப் பேணுவதாக ஒத்துக் கொண்டன. சிரியா தொடர்பான இந்த மூன்று நாடுகளிடையேயான ஒற்றுமையை ஈரான் சந்தேகக் கண்களுடனேயே பார்க்கின்றது. இரசியா சிரியா தொடர்பாக அரபு நாடுகள், இஸ்ரேல், ஐக்கிய அமெரிக்கா, சிரியா எனப் பல தரப்புக்களுடன் பேச்சு வார்த்தை நடத்திக் கொண்டிருக்கின்றது. சிரியா தொடர்பான இரசியாவின் இறுதி நோக்கம் என்பதையிட்டு ஈரான் கரிசனை கொண்டுள்ளது. சொச்சி நகரில் நடந்த பேச்சு வார்த்தைக்கு முன்னர் சிரிய அதிபர் பஷார் அல் அசாத் மொஸ்கோ சென்றது ஈரானுக்கு முன்கூட்டியே அறிவிக்கப்படவில்லை. ஆனால் அப்பயணம் தொடர்பாக முன் கூட்டியே இரசிய அதிபர் விளடிமீர் புட்டீன் அமெரிக்க அதிபர் டொனால்ட் டிரம்பிற்கு அறிவுறுத்தியதுடன் தொலைபேசியூடாக ஒரு கலந்துரையாடலையும் செய்திருந்தார். இது இயல்பாகவே ஈரானை எரிச்சலூட்டக் கூடிய ஒன்றுதான்.

கட்டவிழ்த்த கட்டார்
இரசிய வெளியுறவுத் துறை அமைச்சர் செர்கி லவ்ரோவ் காட்டாருக்கு மேற்கொண்ட பயணத்தின் போது வளைகுடாப் பிராந்தியத்தில் உள்ள உறுதியற்ற நிலைபற்றி தனது கரிசனையை வெளியிட்டார். அமெரிக்காவை நம்பிப் பயனில்லை என்ற நிலையில் கட்டார் தனக்கான ஆதரவுத்தளத்தை ஈரான், துருக்கி, இரசியா என விரிவு படுத்துகின்றது. கட்டாரின் வான் பாதுகாப்புப் பணியை இரசியா ஏற்க முன் வந்துள்ளது.

ஈராக்கும் இரசியாவும்: நானா குர்திஷ்த்தானா?
ஈராக்கிய சியா இஸ்லாமிய ஆட்சியாளர்கள் தமது நாட்டில் ஐஎஸ் அமைப்பை ஒழிப்பதற்கு ஈரானைப் பெரிதும் நம்பினார்கள். அமெரிக்காவின் உதவியை இரு கைகளும் நீட்டி வரவேற்றனர். ஆனால் இரசியாவை தமது நாட்டுக்குள் அனுமதிக்க வில்லை. ஆனால் ஐஎஸ் தொடர்பான உளவுத் தகவல்களை இரு நாடுகளும் பகிர்ந்து கொண்டன. ஈராக் எழுபத்தி மூன்று T-90S மற்றும் T-90SK போர்த் தாங்கிகளை இரசியாவிடமிருந்து வாங்கவுள்ளது. அதே வேளை ஈராக்கில் உள்ள குர்திஷ் பிராந்திய அரசிடமிருந்து இரசியா எரிபொருள் வாங்க முடிவு செய்ததையும் அப்பிராந்தியத்தில் எரிபொருள் விநியோகக் குழாய்களில் இரசியா முதலீடு செய்ய முடிவு செய்ததையும் ஈராக்கிய அரசு கடுமையாக ஆட்சேபித்தது.


யேமன் 
ஒரு சாதாரண படைக்குழுவாக இருந்த ஹூதிகள் தற்போது சவுதி அரேபியா வரை பாயக் கூடிய ஏவுகணைகளைக் கொண்ட வலிமை மிக்க படையாக மாறியுள்ளது. அரபு நாட்டின் வறுமை மிக்க நாடாகிய யேமன் உள் நாட்டுப் போராலும் சவுதி அரேபியா தலைமையிலான படையினரின் தாக்குதல்களாலும் சின்னா பின்னமாகிக் கொண்டிருக்கின்றது. 2017 டிசம்பர் 4-ம் திகதி யேமனின் முன்னாள் அதிபர் அலி அப்துல்லா சலே சவுதி அரேபியாவிற்குத் தப்பி ஓடுகையில் கொல்லப்பட்டார் என ஹூதி போராளிகள் அறிவித்தனர். 2017 டிசம்பர் 2-ம் திகதி யேமனில் இருந்து ஐக்கிய அரபு அமீரகத்தின் தலைநகர் அபுதாபியில் கட்டப்பட்டுக் கொண்டிருக்கும் அணு உலை மீது யேமலில் இருந்து ஏவுகணை வீசியதாக ஹூதி போராளிகள் தெரிவித்தனர். 

ஈராக்கும் ஈரானும்
அண்மைக் கால வரலாற்றிலே மேற்காசியாவில் மிக நீண்ட காலம் போர் புரிந்த நாடுகள் ஈரானும் ஈராக்கும் ஆகும். வளைகுடாவை தனது ஆதிக்கத்தின் கீழ் கொண்டு வரவேண்டும் என்ற ஈராக்கின் நீண்டகாலக் கனவை தடுத்து நிறுத்தியவர் முன்னாள் ஈராக்கிய அதிபர் சதாம் ஹுசேய்ன். ஈராக்கின் ஐ எஸ் அமைப்புக்கு எதிரான போரின் போதும் குர்திஷ் தனிநாட்டுப் பிரகடனத்தின் போதும் ஈரானுக்கு ஈராக் படைத்துறை ரீதியாகவும் அரசுறவியல் நடவடிக்கை ரீதியாகவும் பேருதவி புரிந்தது. நீண்ட காலம் சுனி முஸ்லிம்களின் ஆட்சியின் கீழ் இருந்த ஈராக்கை சியா முஸ்லிம்களின் ஆட்சியை உருவாக்கி அதைத் தக்க வைப்பதில் ஈரானின் பங்களிப்பு காத்திரமானது. ஐ எஸ் அமைப்பினரிடமிருந்து பஸ்ரா நகரை மீட்பதில் ஈரானின் படையினர் பெரும் பங்கு வகித்தனர். இப்போது ஈராக்கிலும் ஈரானிய ஆதரவுப் படையினர் பெருமளவில் இருக்கின்றனர்.

ஆப்பிழுத்த அமெரிக்கா
சிரியாவில் பஷார் அல் அசாத்தின் ஆட்சி அகற்றப்பட வேண்டும், இஸ்லாமியத் தீவிரவாதம் ஒழிக்கப் படவேண்டும் இஸ்ரேலின் பாதுகாப்பிற்கு உத்தரவாதம் வேண்டும் என்ற கொள்கையுடன் சிரியாவில் தலையிட்டது அமெரிக்கா. சிரியாவின் உள்நாட்டுப் போர் தொடங்கும் போது இரசியா உலக விவகாரங்களில் இருந்து விலகி இருந்தது. உக்ரேன் தனது எதிரிகளின் கைகளுக்குப் போவதைத் தடுக்க அது உலக விவகாரங்களில் தலையிட வேண்டிய சூழல் உருவானது. சிரியாவில் அதிபர் பஷார் அல் அசாத்திற்கு ஆதரவாக அங்கு களமிறங்கியது அமெரிக்காவில் அமெரிக்காவிற்கு பெரும் சிக்கலானது. ஐ எஸ் அமைப்பு போராளிகளிடமிருந்து நிலங்களைக் கைப்பற்றுவதில் வெற்றி காண அமெரிக்காவிற்கு உதவிய போராளிக் குழுக்கள் இரண்டு வகைப்படும். ஒன்று குர்திஷ் போராளிக் குழு மற்றது அரபுக்களைக் கொண்ட பல்வேறுபட்ட போராளி அமைப்புக்கள். அசாத் அரசு முழு சிரியாவையும் தனது கட்டுப்பாட்டில் கொண்டுவர வேண்டும் என்கின்றார். அது அவரால் முடியும். ஆனால் அமெரிக்காவிற்காகப் போராடிய குழுக்களின் எதிர்காலம் என்ன என்ற கேள்வி அமெரிக்காவின் நம்பகத்தைதன்மைக்கு சவால் விடுக்கின்றது. ஏற்கனவே பல தடவைகள் அமெரிக்காவால் முதுகில் குத்தப்பட்ட குர்திஷ் போராளிகள் அமெரிக்காவிற்கு எதிராகத் திரும்பலாம். அமெரிக்கா பயிற்ச்சியும் படைக்கலன்களும் வழங்க்கிய பல போராளிகள் அல் கெய்தாவின் கிளை அமைப்பான ஜபத் அல் நஸ்ரா அமைப்புடன் இணைகின்றார்கள். அது அமெரிக்காவிற்கு ஆபத்து விளைவிக்கக் கூடியது.

கால் விட்டுத் தவிக்கும் சவுதி
2011-ம் ஆண்டு யேமனிலும் அரபு வசந்தம் எனப்படும் மக்கள் எழுச்சி உருவானது. அதுவும் சிரியாவைப் போலவே ஒரு பெரும் உள்நாட்டுப் போராக மாறியது. அதை ஹூதி இனத்தவர் தமக்குச் சாதகமாகப் பயன்படுத்தி ஆட்சியைக் கைப்பற்ற முயன்றனர். அவர்களுக்கு ஈரானும் லெபனானில் இருந்து செயற்படும் சியா அமைப்பான ஹிஸ்புல்லாவும் ஆதரவு வழங்கின. பூகோள ரீதியில் யேமன் ஈரான் சார்பு ஆட்சியாளர்களின் கைகளில் இருப்பது சவுதி அரேபியாவிற்குப் பின்னடைவை ஏற்படுத்தலாம். செங்கடலுக்கும் ஏடன் வளை குடாவிற்கும் இடையிலான குறுகிய மண்டெப் நீரிணை (Mandeb Strait) யேமனை ஒட்டியே இருக்கின்றது. அதன் ஒரு புறத்தில் யேமனும் மறு புறத்தில் சோமாலியாவும் எதியோப்பியாவும் இருக்கின்றன. இந்த சிக்கலான நிலையில் யேமனில் சவுதியின் எதிரிகள் ஆட்சியில் அமர்வது ஆபத்தானதாகும். இதனால் 2015 மார்ச் மாதம் 26-ம் திகதி சவுதி அரேபியா தலைமையிலான கூட்டுப் படையினர் யேமனில் ஹூதி இனத்தினர் மீது தாக்குதல் தொடுக்கத் தொடங்கினர். ஆனால் சவுதி அரேபியா அப்பாவிகளைக் கொன்று குவிப்பதாக உலகெங்கும் இருந்து குற்றச் சாட்டுக்கள் முன்வைக்கபட்டு வருகின்றது. அங்கு ஒரு வெல்ல முடியாத போரை சவுதி அரேபியா செய்வதாகப் படைத்துறை நிபுணர்கள் கருத்து வெளியிடுகின்றனர். யேமனில் அகப்பட்டுள்ள தனது கால்களை சவுதி அரேபியா கௌரவமாக வெளியே எடுக்க விரும்புகின்றது என்பதை இரசியா அறியும். சவுதி ஏற்றுக் கொள்ளக் கூடிய வகையில் அங்கு இரசியா தலையிடுவதை சவுதி அரேபியா விரும்பும் என்பதையும் இரசியா அறியும். இந்த நிலையில் அங்கு தலையிட இரசியா காய்களை நகர்த்துகின்றது. 2017 ஒக்டோபரில் இரசியாவிற்குப் பயணம் மேற்கொண்ட சவுதி அரேபிய வெளியுறவுத் துறை அமைச்சர் ஆல் அல் ஜுபீர் இரு நாடுகளுக்கும் இடையில் பல முனைகளில் ஒத்துழைப்பு வளர்க்கப்படும் என்றார். யேமனில் சவுதி ஆதரவு அமைப்புக்களில் ஒன்றான இஸ்லாமிய சகோதரத்துவ அமைப்பின் அல் இஸ்லா படைக்குழுவின் மீது ஐக்கிய அரபு அமீரகத்தின் வான்படையினர் தாக்குதல் செய்யத் தொடங்கியதில் இருந்து யேமனில் சவுதி அரேபியாவின் நிலை மேலும் சிக்கலானது. இந்த நிலையில் சவுதிக்கு சாதகமாக இரசியா யேமனில் காய்களை நகர்த்துவது அங்கு அமெரிக்காவை ஓரம் கட்டும் என இரசியக் கொள்கை வகுப்பாளர்கள் கருதுகின்றார்கள். யேமனில் பல சமாதான முயற்ச்சிகளை மேற்கொண்ட குவைத்தும் ஓமானும் பயன் ஏதும் கிடைக்காததனால் களைப்பும் சலிப்பும் அடைந்துவிட்டன.

லெபனான்
லெபனானில் உருவாக்கப் பட்ட ஹிஸ்புல்லா அமைப்பு சிரியாவிலும் யேமனிலும் சவுதி அரேபியாவின் கேந்திரோபாய நலன்களுக்கு எதிராகச் செயற்பட்டுக் கொண்டிருப்பதால் அதை அடக்க சவுதி அரேபியா விரும்புகின்றது. ஹிஸ்புல்லா லெபனானில் மட்டும் செயற்படவேண்டும்; இஸ்ரேலுக்கு எதிராக மட்டும் செயற்பட வேண்டும் என்ற நிலைப்பாட்டில் சவுதி அரேபியா இருக்கின்றது. ஈரானின் மதவாத ஆட்சியாளர்கள் ஈராக், சிரியா, லெபனான் ஆகியவற்றை உள்ளடக்கிய ஒரு சியா பிறைத்திட்டத்தை நிறைவேற்ற முனைப்புக் காட்டுகின்றது. அதையிட்டு அரபு நாடுகள் மட்டுமல்ல இஸ்ரேலும் அதிக கரிசனை கொண்டுள்ளது. மேற்காசியாவின் அடுத்த சிக்கலான போர்க்களமாக லெபனான் உருவெடுக்கும் ஆபத்து உருவாகியுள்ளது.

தன்னிலை இழக்க விரும்பாத இஸ்ரேல்
அரபு வசந்தத்தின் பின்னர் இஸ்லாமிய சகோதரத்துவ அமைப்பு ஆட்சிக்கு வந்ததால் கரிசனை கொண்ட இஸ்ரேல் அது ஆட்சியில் இருந்து அகற்றப்பட்டு முன்பு இருந்ததிலும் பார்க்க மோசமான நிலையை அடைந்ததால் நிம்மதியடைந்தது. சிரியா இனி தன்னுடைய எதிரி நாடாக இருக்கும் என இப்போது இஸ்ரேல் நினைக்கின்றது. தனது பாதுகாப்பிற்கு அச்சுறுத்தல் உருவாகுவதைக் கொஞ்சம் கூட இஸ்ரேல் அனுமதிப்பதில்லை. முன்கூட்டியே நடவடிக்கைகள் எடுத்துவிடும்.
சிரியாவில் ஈரானிய ஆதரவு படைக்குழுக்கள் நிலைகொள்வதற்கு அமெரிக்காவும் இரசியாவும் உடன்பட்டுள்ளன. அது லெபனானூடாக இஸ்ரேலுக்கு அச்சுறுத்தலை ஏற்படுத்தும் என்பதால் இஸ்ரேல் கலவரமடைந்துள்ளது. சிரிய விவகாரத்தில் இரசியாவுடன் பல அம்சங்களில் இஸ்ரேல் ஒத்துழைத்தது. சிரியாவில் நிலைகொண்டுள்ள ஈரானிய சார்புப் படைக்குழுக்களால் இஸ்ரேலுக்கு ஆபத்து ஏற்படாது என இரசிய வெளியுறவுத் துறை அமைச்சர் சேர்கி லவ்ரோவ் இஸ்ரேலுக்கு உறுதியளித்துள்ளார்.


ஈரானின் விரிவாக்கக் கனவும் அதையிட்ட சவுதி அரேபியாவின் கரிசனையும் அரபு இஸ்ரேல் மோதலிலும் பார்க்க ஆபத்தானது. அது பேரழிவைக் கொண்டு வரக் கூடியது என்பது சிரியாவிலும் யேமனிலும் நிரூபிக்கப் பட்டுள்ளது. இதில் எல்லோரும் பலஸ்த்தீனியர்களை மறந்து விட்டனர் 

Thursday, 30 November 2017

மூன்று சுற்றுக்களிலும் முற்றுப் பெறாத உக்ரேன் பிரச்சனை

உக்ரேனில் அமைதியை ஏற்படுத்துவதற்காக அமெரிக்காவின் உக்ரேனுக்கான சிறப்புப் பிரதிநிதி கேர்ட் வொல்கரும் இரசிய அதிபர் விளடிமீர் புட்டீனின் சிறப்பு ஆலோசகர் விலடிஸ்லே சுர்கோவும் 2017 நவம்பர் 13-ம் திகதி நடத்திய பேச்சு வார்த்தையில் ஒரு சுமூகமான உடன்பாடு எட்டப்படவில்லை. சேர்பியத் தலைநகர் பெல்கிரேட்டில் நடந்த இந்த மூன்றாவது சுற்றுப் பேச்சு வார்த்தையின் முடிவில் இரு நாடுகளும் அமைதி ஏற்படுத்துவது தொடர்பாக வெவ்வேறு எண்ணக்கருக்களைக் கொண்டிருப்பதாகவும் ஆனால் அமைதிக்கான பேச்சு வார்த்தை தொடரும் எனவும் தெரிவித்தனர்.

முதல் இரு சுற்றுப் பேச்சு வார்த்தைகள்
அமெரிக்க மற்றும் இரசியப் பிரதிநிதிகளான வொல்கரும் சுர்கோவும் பெல்கிரேட்டில் 2017 ஓகஸ்ட் 21-ம் திகதி முதலாவது சுற்றுப் பேச்சு வார்த்தையும் ஒக்டோபர் 7-ம் திகதி இரண்டாம் சுற்றுப் பேச்சு வார்த்தையும் நடத்தியிருந்தனர். கேர்ட் வொல்கரும் முன்பு நேட்டோவிற்கான அமெரிக்கப் பிரதிநிதியாகக் கடமையாற்றியவர். இரசியப் பிரதிநிதி விலடிஸ்லே சுர்கோவிற்கு எதிராக ஐரோப்பிய ஒன்றியம் பயணத் தடை விதித்திருந்தது. முதலாம் சுற்றுப் பேச்சு வார்த்தையில் எந்த இணக்கமும் ஏற்படவில்லை. பேச்சு வார்த்தை சுமூகமாகவும் நேர்மையுடனும் நடைபெற்றது என இருதரப்பினரும் முடிவில் தெரிவித்தனர். இரண்டாம் பேச்சு வார்த்தையில் ஐக்கிய் நாடுகள் சபையின் அமைதிப்படையை உக்ரேனுக்கு அனுப்புவது பற்றிய கருத்து முன் வைக்கப்பட்டது.

உக்ரேன் பிரச்சனையின் வரலாறு
1991-ம் ஆண்டு சோவியத் ஒன்றியத்தின் வீழ்ச்சிக்குப் பின் உக்ரேன் தனி நாடாகியது. அப்போது  சோவியத் ஒன்றியத்தின் மூன்றில் ஒரு பங்கு அணுக் குண்டுகள் உக்ரேன் நாட்டின் வசமாகியது. இதானால் உக்ரேன் உலகிலேயே ஐக்கிய அமெரிக்காவிற்கும்   இரசியாவிற்கும் அடுத்த படியாக மூன்றாவது பெரிய அணுக்குண்டு  நாடாக உருவெடுத்தது.  ஆனால் ஐக்கிய அமெரிக்காவும் இரசியாவும் அதை விரும்பவில்லை. அரசியல் உறுதிப்பாடில்லாத ஒரு புதிய நாட்டிடம் அதிக அணுக்குண்டுகள் இருப்பது  எங்கு போய் முடியும் என்ற அச்சம் பல நாடுகளிடம் அப்போது இருந்தது. உக்ரேனின் முதல் அதிபர் லியோனிட் கிரவ்சக்  தமது நாட்டில் உள்ள அணுக்குண்டுகளை இரசியாவிடம் ஒப்படைத்து அவற்றை அழிப்பதற்கு  நிபந்தனை அடிப்படையில் ஒப்புக்கொண்டார். அவர் கேட்ட நிபந்தனை  பியூடப்பெஸ்ற் குறிப்பாணை அதாவது The Budapest Memorandum என்னும் பெயரில் ஏற்றுக் கொள்ளப்பட்டது.   அதன்படி உக்ரேனின் பிராந்திய ஒருமைப்பாட்டை  இரசியா, ஐக்கிய அமெரிக்கா, பிரித்தானியா ஆகிய நாடுகள்  உறுதி செய்வதாக ஒத்துக் கொண்டன. சோவியத் ஒன்றியத்தின் வீழ்ச்சிக்குப் பின்னர் தனது ஆதிக்க நிலப்பரப்பை  இரசியா விரிவாக்கவே விரும்பியது. அதன் முதல் முயற்ச்சியாக இரசியாவும், உக்ரேனும், பெலரசும் இணைந்து  சுதந்திர நாடுகளின் பொதுநலவாயம் என்னும் கூட்டமைப்பை 1991-ம் ஆண்டு டிசம்பர் மாதம் உருவாக்கின. பின்னர் இதில் ஆர்மினியா, அஜர்பைஜான், கஜகஸ்த்தான், கிர்க்கிஸ்த்தான், மோல்டோவா,   தேர்க்மெனிஸ்த்தான்,   தஜிகிஸ்த்தான்,   உஸ்பெக்கிஸ்த்தான் ஆகிய நாடுகள் இணைந்தன.   1993-ம் ஆண்டு ஜோர்ஜியாவும் இணைந்து கொண்டது. பின்னர் உக்ரேன், ஜோர்ஜியா, தேர்க்மெனிஸ்த்தான் ஆகிய நாடுகளில் நடந்த ஆட்சி மாற்றத்தால் அவை இந்த இரசியா தலைமையிலான சுதந்திர நாடுகளின் பொதுநலவாயம் என்னும் கூட்டமைப்பில் இருந்து வெளியேறின. ஆனால் உக்ரேனை ஐரோப்பிய ஒன்றியத்திலும் நேட்டோவிலும் இணைக்கும் சதிகள் திரைமறைவில் நடப்பதை அறிந்த இரசிய அதிபர் விளடிமீர் புட்டீன் கடும் சினமடைந்தார். உக்ரேன் நேட்டோவில் இணைந்தால் இரசியா ஒரு வல்லரசு என்ற நிலையை இழக்க நேரிடும் எனப் படைத்துறை நிபுணர்கள் கருத்துத் தெரிவிக்குமளவிற்கு இரசியாவிற்கு உக்ரேன் கேந்திர முக்கியத்துவம் மிக்க நாடாகும். உக்ரேனை ஐரோப்பிய ஒன்றியத்திலும் நேட்டோவிலும் இணைப்பதற்கு ஏற்ப அங்கு ஆட்சி மாற்றம் அரங்கேற்றப்பட்டு பெட்றே பொரோஷெங்கோ (Petro Poroshenko)உக்ரேனின் ஆட்சி பீடத்தில் ஏறினார். கிறிமியாத் தீபகற்பம் உட்பட்ட உக்ரேனின் கிழக்குப் பிராந்தியத்தில் இரசியர்களே அதிகம் வாழ்கின்றனர். இரசியாவுடன் எல்லையைக் கொண்ட இப்பிராந்தியத்தில் இரசியர்களே பெரும்பான்மையினராக வாழ்கின்றனர். இவர்கள் சோவியத் ஒன்றியத்தில் உக்ரேன் இணைந்திருந்த வேளையில் குடியேறியவர்கள். இதனால் உக்ரேனின் கிழக்குப் பிராந்தியத்தில் பிரிவினைவாதம் இலகுவாக உருவாக்கப்பட்டது. இரசியா கிறிமியாவை தன்னுடன் இணைத்துக் கொண்டது. உக்ரேனின் கிழக்குப் பிராந்தியத்தில் பெருமளவு இரசியப் படைகள் கனரகப் படைகலன்களுடன் இரகசியமாக நிலைகொண்டிருப்பதாக மேற்கு நாடுகள் குற்றம் சாட்டுகின்றன.

வெளுக்காத கிழக்கு
உக்ரேனின் கிழக்குப் பிராந்தியத்தில் உள்ள டொனெட்ஸ்க், லுதன்க்ஸ்க் (Donetsk and Luhansk) ஆகிய மாகாணங்கள் இரசிய ஆதரவுப் பிரிவினைவாதிகளின் கட்டுப்பாட்டில் இருக்கின்றன. அந்த மாகாணங்களில் உள்ள அமைதியற்ற சூழலை முடிவுக்குக் கொண்டுவர அங்கு ஐக்கிய நாடுகள் சபையின் அமைதிப்படையினரை நிறுத்த இரசியாவும் அமெரிக்காவும் முயல்வதாகத் தெரிவித்தன. பிரிவினைவாதிகளுக்கும் உக்ரேன் அரசுக்கும் மோதல் நடக்கும் உக்ரேனின் கிழக்குப் பிராந்தியத்தில் கனரகப் படைக்கலன்கள் இருக்கக் கூடாது என்பது அமெரிக்காவின் நிலைப்பாடு என கேர்ட் வொல்கர் பேச்சு வார்த்தைக்கு முன்னர் கருத்து வெளியிட்டிருந்தார்.

உறை நிலையில் இருந்து உருகு நிலை
உக்ரேனின் கிழக்குப் பிராந்தியம் நவம்பரில் பனியால் மூடப்பட்டு உறைந்து போய் இருக்கும். அங்கு நடந்த போரும் கடந்த சில மாதங்களாக உறைநிலையிலேயே இருந்தது. Luhansk People's Republic என்று தம்மைப் பிரகடனப் படுத்தி ஒரு “அரசை” லுதன்க்ஸ்க் மாகாணத்தில் நடத்தி வருபவர்களுக்கு இடையில் ஒரு குழப்ப நிலை 2017 நவம்பர் 27-ம் திகதி உருவானது. உள்துறை அமைச்சர் Igor Kornetஐ அரசுத் தலைவர் Igor Plotnitsky  பதவி நீக்கம் செய்வதாக அறிவித்தார். ஆனால் காவற்துறையைத் தன்வசம் வைத்திருந்த உள்துறை அமைச்சர் Igor Kornet அதிபர் Igor Plotnitskyஐ பதவி நீக்கம் செய்தார். இதனால் Igor Plotnitsky இரசியாவிற்குத் தப்பி ஓடினார். டொனெட்ஸ்க் மாகாணத்தில் இருந்து வந்த படையினர் Igor Kornetஇற்கு உதவி செய்து Igor Plotnitskyஇன் ஆதரவாளர்களைக் கைது செய்தனர். பின்னர் Igor Plotnitsky உடல் நலமின்மையால் பதவி விலகுவதாக அறிவித்தார். பாதுகாப்புத் துறை அமைச்சர் Leonid Pasechnik இடைக்கால அரசுத் தலைவராகப் பதவி ஏற்றுக் கொண்டார். இரசியாவில் ஏற்பட்டஉள்ளகப் போட்டியால் உக்ரேனில் பதவிப் போட்டி நடப்பதாக மேற்கத்தைய ஊடகங்கள் கருத்து வெளியிட்டுள்ளன.

எந்த எல்லையில் அமைதிப்படை?
ஐக்கிய நாடுகள் சபையின் அமைதிப்படையினரை இரசிய ஆதரவாளர்களின் கட்டுப்பாட்டில் உள்ள உக்ரேனின் பிரதேசங்களையும் ஏனைய உக்ரேன் பிரதேசத்திற்கும் இடையிலான எல்லையில் நிறுத்தப்பட வேண்டும் என 2017 செப்டம்பரில் இரசிய அதிபரி விளடிமீர் புட்டீன் தெரிவித்திருந்தார். அதற்கு உக்ரேனில் இருந்தும் மேற்கு நாடுகளில் இருந்தும் கடும் எதிர்ப்புக்கள் கிளம்பின. அதனால் உக்ரேனின் கிழக்குப் பிராந்தியத்தில் உக்ரேனைய அரசு ஏதும் செய்ய முடியாத நிலை ஏற்படும். ஆனால் இரசியா தனது படையினரையும் படைக்கலன்களையும் உக்ரேனில் உள்ள தனது ஆதரவாளர்களுக்கு தொடர்ந்து தடையின்றி அனுப்பலாம் என அதை எதிர்ப்பவர்கள் கருத்து வெளியிட்டனர். அதனால் இரசிய அதிபரின் முன்மொழிவு உக்ரேனை இரண்டாகப் பிரிக்கும் சதி என விமர்சிக்கப்பட்டது. அதைத் தொடர்ந்து தனது முன்மொழிவுகள் பேச்சு வார்த்தை மூலம் மாற்றக் கூடியது என புட்டீன் தெரிவித்திருந்தார். உக்ரேனும் மேற்கு நாடுகளும் இரசிய உக்ரேன் எல்லையில் ஐக்கிய நாடுகள் சபையின் அமைதிப்படையினர் நிறுத்தப்பட வேண்டும் என விரும்புகின்றன.

மின்ஸ்க் உடன்படிக்கை
உக்ரேனின் கிழக்குப் பிராந்தியத்தில் உள்ள டொனெட்ஸ்க் ஆகிய மாகாணங்களில் 2014 ஏப்ரல் மாதம் பிரிவினைவாதிகளுக்கும் உக்ரேன் அரசுக்கும் இடையில் தொடங்கிய மோதலில் பத்தாயிரத்திற்கு மேலானவர்கள் பலியாகியுள்ளனர். இருதரப்பினருக்கும் இடையில் மோதலைத் தவிர்க்கும் பேச்சு வார்த்தைகள் செப்டம்பர் 2014இலும் பெப்ரவரி 2015இலும் பெலரஸ் தலைநகர் மின்ஸ்கில் நடந்து மோதல் தவிர்ப்பு ஒப்பந்தங்கள் செய்யப்பட்டன. அதற்கு மின்ஸ்க் உடன்படிக்கை எனப் பெயரும் இடப்பட்டன. இருதரப்பினரும் அதை மீறி மோதலில் ஈடுபட்டனர். அமெரிக்காவின் உக்ரேனுக்கான சிறப்புப் பிரதிந்தி கேர்ட் வொல்கரும் இரசிய அதிபர் விளடிமீர் புட்டீனின் சிறப்பு ஆலோசகர் விலடிஸ்லே சுர்கோவும் 2017 நவம்பர் 13-ம் திகதி நடத்திய பேச்சு வார்த்தையின் முடிவில் வெளிவிட்ட கூட்டறிக்கையில் மின்ஸ்க் உடன்படிக்கைப் படி மோதல் தவிர்ப்புச் செய்வதற்கு அரசியல் ரீதியாகவும் படைத்துறை ரீதியாகவும் செயற்திட்டங்கள் மேற்கொள்ளப்பட வேண்டும் எனத் தெரிவிக்கப் பட்டிருந்தது.

பொருளாதாரத் தடையும் அமைதிப்படையும்
2014இல் உக்ரேனின் கிறிமியாவை இரசியா தன்னுடன் இணைத்தமைக்கும் உக்ரேனின் கிழக்குப் பிராந்தியத்தில் இரசியா பிரிவினைவாதிகளுக்கு ஆதரவு கொடுப்பதற்கும் எதிராக ஐரோப்பிய ஒன்றியமும் அமெரிக்காவும் கனடாவும் இரசியாவிற்கு எதிராக கடுமையான பொருளாதாரத் தடைகளை கொண்டு வந்தன. உக்ரேனில் மேற்கு நாடுகளின் வேண்டுகோளின் படி ஐநா அமைதிப்படையை நிறுத்தினால் அதற்குப் பதிலாக இரசியா மீதான பொருளாதாரத் தடையை நீக்க வேண்டும் என்ற இரசியாவின் கோரிக்கையை ஜேர்மனி உடனடியாக நிராகரித்தது. இரண்டையும் தொடர்புபடுத்தக் கூடாது என்பது மேற்கு நாடுகளின் நிலைப்பாடாகும்.

முழு உக்ரேனும் இரசியாவிற்கு வேண்டும்
இரசியாவிற்கு கிறிமியா கட்டாயம் வேண்டும். இரசியாவின் கடற்படைக்கு அது மிக முக்கியமாகும். அடுத்து இரசியாவிற்கு மேற்கு நாடுகளிடமிருந்து தன்னைப் பாதுகாக்க முழு உக்ரேனும் அவசியமாகும். உக்ரேன் இரசியாவின் பாதுகாப்புக் கவசமாகும் என்பதாலே உக்ரேன் இரசியாவின் எதிரிகள் வசமானால் இரசியா தனது வல்லரசு என்ற நிலையை இழக்க வேண்டும் எனத் தெரிவிக்கப்படுகின்றது. முழு உக்ரேனையும் வன்முறை மூலம் இரசியமயமாக்க முடியாது. இரசியா உக்ரேனின் டொனெட்ஸ்க் ஆகிய இரசியர்கள் பெரும்பான்மையினராக வாழும் மாகாணங்களை மட்டும் தனதாக்கினால் அது இரசியாவின் பாதுகாப்பிற்கு உத்தரவாதமளிக்காது. தொடர்ந்தும் அந்த இரு மாகாணங்களில் உள்ள பிரிவினைவாதிகளுக்கு கொடுக்கும் ஆதரவு முழு உக்ரேனியர்களையும் இரசியாவிற்கு எதிராகத் திருப்பிக் கொண்டிருக்கின்றது.

இரசியாவிற்கு செலவு மிக்க உக்ரேன்
மேற்கு நாடுகளின் பொருளாதாரத் தடைகளாலும் சரிந்து போன எரிபொருள் விலையாலும் இரசியப் பொருளாதாரம் பாதிப்புக்கு உள்ளாகியது. உக்ரேனின் டொனெட்ஸ்க் ஆகிய மாகாணங்களில் உள்ள அரச ஊழியர்களின் சம்பளத்திற்கும் ஓய்வூதியத்திற்கு மட்டும் இரசியா ஆண்டு தோறும் ஒரு பில்லியன் அமெரிக்க டொலர்களுக்கும் அதிகமாகச் செலவு செய்கின்றது என ஜேர்மனிய நிறுவனம் ஒன்று மதிப்பிட்டுள்ளது. இரசியா செய்யும் மொத்தச் செலவு ஆண்டு ஒன்றிற்கு ஆறு பில்லியன் டொலர்களுக்கும் அதிகம் என உக்ரேனிய அரச நிறுவனம் ஒன்றின் மதிப்பீடு தெரிவிக்கின்றது. இது சற்றி மிகைப்படுத்தப்பட்ட மதிப்பீடு எனவும் கருதப்படுகின்றது. ஒரு முடிவில்லாத பிரச்சனைக்கு இரசியா தொடர்ந்து பெருந்தொகைப் பணத்தை செலவு செய்ய முடியுமா?

டிரம்பின் கைகளைக் கட்டிப்போட்ட பாராளமன்றம்
உக்ரேன் விவகாரச் சிக்கலில் இருந்து இரசியாவைத் தப்ப வைக்கத்தான் டொனால்ட் டிரம்பை விளடிமீர் புட்டீன் தேர்தலில் வெற்றியடைய வைத்தார் என்ற குற்றச் சாட்டு சட்ட அடிப்படையில் அமெரிக்காவில் நிரூபிக்கும் நிலையை ஒட்டி நகர்வுகள் இப்போது அரங்கேறிக் கொண்டிருக்கின்றன. டொனால்ட் டிரம்ப் இரசியாவிற்கு உக்ரேன் விவகாரத்தில் எந்தவித விட்டுக் கொடுப்பும் செய்ய முடியாத அளவிற்கு அமெரிக்கப் பாராளமன்றத்தின் இரு அவைகளிலும் தீர்மானங்கள் நிறைவேற்றப்பட்டன.

சிரியாவில் பஷார் அல் அசாத்திற்கு எதிரான போரில் இரசியா தலையிட்டு அதை உக்ரேன் விவகாரத்தில் பேரம் பேசும் இரசியாவின் உத்தி வெற்றியளிக்கவில்லை. இரண்டையும் தொடர்பு படுத்த மேற்கு நாடுகள் விரும்பவில்லை. ஆனால் சிரியாவில் அசாத்தின் ஆட்சியைப் பாதுகாப்பதில் விளாடிமீர் புட்டீன் வெற்றியடைந்தார். வட கொரியாவிலும் அமெரிக்காவிற்குப் பிரச்சனை கொடுக்கும் வகையில் புட்டீன் செயற்படுகின்றார். ஆனால் புட்டீனின் இந்த நடவடிக்கைகளுக்குப் பதிலடியாக அமெரிக்கா உக்ரேனுக்கு தாக்குதல் படைக்கலன்களை வழங்கத் தொடங்கியுள்ளது. ஆரம்பத்தில் இரசியாவின் நட்புறவை அடிப்படையாக வைத்து உக்ரேனுக்கு கடுமையான தாக்குதல் படைக்கலன்களை அமெரிக்கா வழங்காமல் இருந்தது. இரசியா தொடர்ச்சியாக பல முனைகளில் அமெரிக்காவிற்குப் பிரச்சனை கொடுப்பதைச் சாக்காக வைத்துக் கொண்டு இரசியாவிற்கு சவால் விடக்கூடிய படைக்கலன்கள் உக்ரேனுக்கு இப்போது வழங்கப்படுகின்றன.

சோவியத் ஒன்றியத்தின் உறுப்பு நாடாக இருந்தபோது சிறந்தபடைக்கலன் உற்பத்தி செய்யும் பிரதேசமாக உக்ரேன் இருந்தது. விமானம் தாங்கிக் கப்பல்கள் சிறந்த தாக்குதல் போர்விமானங்கள் உக்ரேனில் தயாரிக்கப்பட்டன. அணுக்குண்டு தயாரிக்கக் கூடிய தொழில்நுட்ப அறிவு உக்ரேனியர்களிடம் இருக்கின்றது. ஆளில்லாப் போர்விமானங்களை உக்ரேனுக்கு வழங்க அமெரிக்கா மறுத்ததனால் உக்ரேன் தானாகவே ஆளில்லாப் போர்விமானங்களை உருவாக்கிவிட்டது. அவற்றில் மொத்தம் ஐம்பது கிலோ கொண்ட நான்கு குண்டுகளையோ அல்லது இரு வானில் இருந்து நிலத்தை நோக்கி வீசும் ஏவுகணைகளையோ எடுத்துச் செல்லலாம். ஆமைப்புறா என்னும் பொருள்பட உக்ரேன் மொழியில் Gorlytsa எனப் பெயரிடப்பட்டுள்ள உக்ரேனின் ஆளில்லாப் போர் விமானங்கள் ஆயிரம் கிலோமீட்டர்களுக்கு அதிகமாக ஏழு மணித்தியாலம் பறக்கக் கூடியவை. ஐயாயிரம் மீட்டர்களுக்கு அதிகமான உயரத்தில் பறக்கக் கூடியவை.

இரசியாவுடன் அதிக அளவு வர்த்தகத்தை செய்து வந்த ஜேர்மனி இரசியாவிற்கு எதிரான பொருளாதாரத் தடையால் தனது ஏற்றுமதி வருமானத்தை இழந்துவிட்டது. உக்ரேனில் ஒரு சுமூகமான தீர்வு விரைவில் வருவதை ஜேர்மனி பெரிதும் விரும்புகின்றது. அத்துடன் இரசியாவில் இருந்து மலிவாகவும் இலகுவாகவும் எரிபொருளை ஜேர்மனி இறக்குமதி செய்ய விரும்புகின்றது.  

உக்ரேனியப் பிரச்சனை பொருளாதாரத் தடை, சிரியாவில் தலையீடு, அமெரிக்கத் தேர்தலில் குறுக்கீடு, வட கொரியாவில் பிரச்சனை எனச் சுற்றி இப்போது மூன்றாவது சுற்றுப் பேச்சு வார்த்தை வரை இழுபடுகின்றது. ஆனால் மோசமடைவது உக்ரேனின் பொருளாதாரம்.


Featured post

உலக கடலாதிக்கப் போட்டியில் விமானம் தாங்கிக் கப்பல்கள்

விமானம் தாங்கிக் கப்பல்கள்  என்பன பல போர்விமானங்கள் நிறுத்தக் கூடிய பாதுகாப்பான இடத்தையும் அவை பறக்கக் கூடிய ஓடுபாதையையும் கொண்டிருக்கும்...