Monday, 9 April 2018

இந்துத்துவாவும் இந்தித்துவாவும்


இந்தியாவின் 29 மாநிலங்களில் லக்சத்வீப், மிசோரம், நாகலாந்து, மெகாலயா, ஜம்மு கஷ்மீர், அருணாச்சலப் பிரதேசம், மனிபுரி, பஞ்சாப் ஆகிய மாநிலங்களில் இந்துக்கள் சிறுபான்மையினராக வாழ்கின்றனர். பிஹார், சதிஸ்க்கர், டில்லி, ஹரியானா, இமாச்சல் பிரதேசம், ஜார்கண்ட், மத்தியப் பிரதேசம், ராஜஸ்த்தான், உத்தரப் பிரதேசம், உத்தரக்காண்ட் ஆகிய மாநிலங்களில் மட்டும் இந்தி மொழி பேசுபவர்கள் அதிகமாக வாழ்கின்றனர். இந்தியாவின் 1.324பில்லியன் மக்களில் 79.8 விழுக்காட்டினர் இந்துக்களாகும். அதேவேளை இந்தி மொழி பேசுபவர்களின் எண்ணிக்கை 42 விழுக்காட்டிற்கும் குறைவானவர்களே.

காங்கிரசின் இந்தித்துவா
இந்தி மொழி பேசுபவர்களின் ஆதிக்கத்தை இந்தியா முழுவதும் நிலை நிறுத்துவதுதான் இந்தித்துவா ஆகும். காங்கிரசுக் கட்சியின் நோக்கமும் அதுவாகும். அதற்காக அது தன்னை மதசார்பற்ற ஓர் அமைப்பாகக் காட்டிக் கொள்கின்றது. இந்தியா முழுவதும் இந்தியை திணிக்க வேண்டும் என்பது காங்கிரசின் கொள்கையாக இருந்தாலும் அதை நிறைவேற்றுவது கடினம் என்பதை காங்கிரசுக் கட்சியினர் உணர்ந்துள்ளனர். இந்தி மொழி பேசுபவர்களின் அதிகாரத்தை காங்கிரசுக் கட்சி நேரு-காந்தி குடும்பத்திடம் ஒப்படைத்துள்ளது. இதுதான் இந்தித்துவக் கொள்கையாகத் தற்போது இருக்கின்றது. இந்தியத்துவா சாதிகளை ஏற்கவில்லை என பகிரங்கமாகச் சொல்லிக் கொண்டாலும் சாதிகளின் அடிப்படையில் மற்ற சிறுபான்மை இனங்களை பிரித்தாளுவதன் மூலம் தனது ஆதிக்கத்தை நிலை நிறுத்தலாம் என்ற நம்பிக்கையுடன் செயற்படுகின்றது. இந்தித்துவா பரந்துபட்ட கலாச்சாரத்தை ஏற்றுக் கொண்டுள்ளது. இந்தியக் கலாச்சாரத்தில் மேற்கு நாட்டுக் கலாச்சாரத்தின் தாக்கத்தையோ தாக்குதல்களையோ அது கண்டு கொள்வதில்லை. இந்தியாவின் ஆட்சி வங்காளியான நேதாஜி சுபாஷ் சந்திரபோஸ் அவர்களின் கைக்களுக்குப் போகாமல் இருக்க இந்தி மொழி பேசுபவர்கள் ஆங்கிலேயர்களுடன் ஒத்துழைத்தனர். பின்னர் சுதந்திர இந்தியாவின் முதலாவது தலைமை அமைச்சராக குஜராத்தியரான சார்தார் வல்லபாய் பட்டேல் வராமல் இந்தி மொழி பேசுபவர்கள் பார்த்துக் கொண்டனர்.

இந்திய அரசியலமைப்பில் இந்தித்துவா
இந்தியாவின் அரசியலமைப்பை உருவாக்கியவர்களில் பண்டிதர் ஜவகர் லால் நேருவும் அம்பேத்காரும் முக்கியமானவர்கள் இருவருமே மதசார்பற்ற இந்திய ஒன்றியத்தை உருவாக்க விரும்பினார்கள். அதனால் உலகிலேயே சிறந்த மதசார்பற்ற அரசியலமைப்பை இந்தியா கொண்டுள்ளது. மாநிலங்களுக்கு அதிக அதிகாரங்கள் வழங்க அம்பேத்கார் விரும்பினார் ஆனால் இந்தி மொழிபேசும் பெரும்பான்மை இனத்திடம் அதிக அதிகாரங்கள் இருக்க வேண்டும் என நேரு விரும்பினார். பெரும்பான்மைவாதியான நேரு தன் கையில் அதிக அதிகாரங்கள் இருக்கச் செய்ய நடுவண் அரசிடம் அதிக அதிகாரங்களைக் குவித்தார். இந்தித்துவா இந்திய அரசியலமைப்பில் இணைக்கப்பட்ட ஒன்று.

இந்துத்துவா
இந்தி மொழியையும் இந்து மதத்தையும் இந்தியா முழுவதும் ஏற்றுக் கொள்ள வைப்பது என்பது ஒரு நீண்ட கனவாகக் கொண்டவர்கள் பலர் இந்தியாவில் உண்டு. இந்தியாவில் உள்ள இந்து அல்லாதவர்களின் மூதாதையர்கள் இந்துவாக இருந்து ஆக்கிரமிப்பாளர்களால் மதமாற்றம் செய்யப்பட்டவர்கள். அவர்களை பரப்புரை மூலமாகவோ அல்லது கட்டாயப்படுத்துவதன் மூலமாகவோ மீண்டும் இந்துக்களாக மாற்றி இந்தியா முழுவதும் இந்துக்கள் இருக்க வேண்டும் என நினைப்பதுதான் இந்துத்துவா. இந்துத்துவா சாதிகள் இல்லை எனப் பகிரங்கமாக அறிவித்தாலும் அது பார்ப்பனிய ஆதிக்கத்தை அடிப்படையாகக் கொண்டது. இந்துத்துவா இந்தி மொழிக்கு முக்கியத்துவம் கொடுத்தாலும் சமஸ்கிருதம் உன்னதமான மொழி என்றும் மற்றவை அதிலும் கீழான மொழி என்றும் கருதுகின்றது. வழிபாடுகள் சமஸ்கிருதத்தில் நடைபெற வேண்டும் என்றும் மற்ற மொழிகளில் பூசைகள் செய்வது ஏற்றுக் கொள்ள முடியாது என்றும் இந்துத்துவா கருதுகின்றது. இந்துக் கலாச்சாரத்தில் மற்ற நாட்டுக் கலாச்சாரங்கள் தாக்கம் செலுத்துவதை இந்துத்துவா கடுமையாக எதிர்க்கின்றது. காதல் திருமணம் பாவகரமான செயல் என அது கருதுகின்றது. வெளிநாடுகளில் இருந்து வந்த காதலர் தினம் போன்றவற்றை அது கடுமையாக எதிர்க்கின்றது. பெண்கள் அடக்கமாக நடக்க வேண்டும் உடல் தெரிய ஆடை அணியக் கூடாது என்றும் கருதும் இந்துத்துவா பெண் என்பவள் ஆணிற்கு சேவை செய்யப் பிறந்தவள் என்ற மனு தர்ம சாஸ்த்திரத்தை ஏற்றுக் கொண்டுள்ளது.

விஷ்வ ஹிந்து பரிசத்தின் கார் வாப்சி
விஷ்வ ஹிந்து பரிசத் அமைப்பினர மீண்டும் வீட்டுக்கு என்ற பொருளுடைய கார் வாப்சி திட்டத்தை நிறைவேற்றி வருகின்றனர். அது இந்தியாவில் உள்ள இஸ்லாமியர்களை இந்துக்களாக மாற்றும் முயற்ச்சியாகும். இந்தியாமீது மொகாலயப் படையெடுப்பால் பல இந்துக்கள் இஸ்லாமியர்கலாக கட்டாய மதமாற்றம் செய்யப்பட்டனர். அவர்களை மீண்டும் இந்துக்களாக மாற்றுவதே கார் வாப்சி திட்டமாகும். இது போலவே ஐரோப்பியர்கள் இந்தியாவில் கிரிஸ்த்தவத்திற்கு மாற்றியவர்களை மீண்டும் இந்து மதத்திற்கு மாற்ற வேண்டும் என்பதும் கார் வாப்சி திட்டத்தின் நோக்கமாகும். இந்தியாவில் எல்லோரும் இந்துக்களாகவே இருந்தார்கள் ஆனால் படையெடுப்பினால் அவர்கள் வேற்று மதங்களைத் தழுவினார்கள் என்ற உண்மை இந்துத்துவா அமைப்பினரை ஆத்திரமடைய வைக்கின்றது. மதமாற்றம் தெலுங்கானா, ஆந்திரப் பிரதேசம், கோவா ஆகிய மாநிலங்களில் பரீட்சார்த்தமாக மேற்கொள்ளப்பட்டன. பல பட்டியல் சாதியினர் மதம் மாறுவதற்கு நிபந்தனையாக தமக்கு கல்வி வேலைவாய்ப்பு போன்றவற்றில் முன்னுரிமை வழங்கப்பட வேண்டும் என வலியுறுத்துவதும் நடந்தது. 2014-ம் ஆண்டு ஆந்திரப் பிரதேசத்திலும் தெலுங்கானவிலும் எண்ணாயிரம் பேர் மதமாற்றம் செய்யப்பட்டனர் என்கின்றது விஷ்வ ஹிந்து பரிசத் அமைப்பு.

இஸ்லாமியர்களுக்கு எதிரான அடக்குமுறை
இந்துத்துவா மற்ற மதங்களுக்கு எதிரான அடக்கு முறையை இந்தியாவின் அதிக அளவு மக்கள் தொகையைக் கொண்ட உத்தரப் பிரதேசத்தில் கடுமையாகப் பிரயோகித்து வருகின்றது. மாட்டிறைச்சி உண்பவர்கள் மீது தாக்குதல் நடத்துவது அங்கு அடிக்கடி நடக்கின்றது. இறைச்சிக்காக மாட்டிறைச்சியைக் கொண்டு சென்றதாகக் கருதப்படும் ஓர் இஸ்லாமிய இளைஞனை வற்புறுத்தி மாட்டு மூத்திரத்தை குடிக்கவும் சாணியை உண்ணவும் வைத்த சம்பவங்கள் நடந்தன. காதலர்களாக உலவிய ஒரு ஆணையும் பெண்ணையும் பிடித்து நிர்வாணமாக்கி அடித்து ஒருவரை ஒருவர் மாறி மாறி தூக்கிச் செல்ல நிர்ப்பந்திக்கப்பட்டனர். ஆணைத் தூக்க முடியாமல் பெண் சரிந்து விழுந்த போது அவள் கடுமையாகத் தாக்கப்பட்டாள். பல கிரிஸ்த்தவர்கள் கட்டாயமாக மத மாற்றம் செய்யப்பட்டு அவர்களது தேவாலயங்கள் இந்துக் கோவில்களாக மாற்றப்பட்டன. பாடசாலைகள் தோறும் ஆர் எஸ் எஸ் மற்றும் விஷ்வ ஹிந்து பரிசத் அமைப்பினர் சென்று இந்து மதவெறியை ஊட்டும் வகையில் பரப்புரை செய்வதாகவும் குற்றச் சாட்டுகள் முன்வைக்கப்பட்டன. உத்தரப் பிரதேசத்தில் உள்ள இராமர் பிறந்த இடமான அயோத்தி, கங்கை நதியின் முக்கிய இடமான வரணாசி, கண்ணன் அவதரித்த இடமான மதுரா ஆகிய மூன்றும் புனித தீர்த்த தலங்களாக பிரகடனப்பட்டுள்ளன. இந்தியாவின் ஆன்மிகத் தலைநகர் வரணாசி என்கின்றனர் இந்துத்துவாவாதிகள்.

காதல் ஜிஹாதிகள்
இஸ்லாமிய இளைஞர்கள் இந்துப் பெண்களைக் காதலில் விழவைத்து அவர்களைத் திருமணம் செய்து இந்துக்களை மதம் மாற்றுகின்றார்கள் என்ற குற்றச் சாட்டை இந்துத்துவாக் கொள்கையுடையவர்கள் முன் வைக்கின்றார்கள். கேரள மாநிலத்தில்அப்படிப்பட்ட திருமணம் ஒன்றை செல்லுபடியற்றதாக்க வேண்டும் என ஓர் இந்துப் பெற்றோர் வழக்கும் தொடுத்தனர். இந்து மதத்திற்கு எதிரான ஒரு பெரும் சதியின் ஒரு பகுதியாகத் தமது மகள் ஒரு இஸ்லாமிய இளைஞனால் மூளைச் சலவை செய்யப்பட்டு அகிலா என்ற அவளது பெயரும் ஹாதியாவாக மாற்றப்பட்டது என்பது அந்தப் பெற்றோரின் வாதமாக இருந்தது. கீழ் நீதிமன்றம் அத்திருமணம் செல்லுபடியற்றது என்ற தீர்ப்பை வழங்கினாலும் உச்ச நீதி மன்றம் அத்திருமணம் சட்ட பூர்வமானது எனத் தீர்ப்பளித்தது.

இந்துத்துவாவும் இந்தியும்
இந்துத்துவா தனது பிரதான ஆதரவுத் தளம் இந்தி மொழி பேசுபவர்கள் என்பதை உணர்ந்துள்ளது. இந்தி பேசும் மக்களைக் கொண்ட பிரதேசம் மற்ற இனங்களாள் சூழப்பட்டுள்ளது என்பதை இந்துத்துவாவினரும் இந்தித்துவாவினரும் உணர்ந்துள்ளனர். இந்தி பேசும் மாநிலங்களின் வடக்கே பாக்கிஸ்த்தானும் வட கிழக்கே சீனாவும் உள்ளன. இந்துக் குடியரசாக இருந்த நேப்பாளம் தற்போது மதசார்பற்ற நாடாக மாறியுள்ளது. இந்தி பேசும் மாநிலங்கள் மேற்கில் பஞ்சாப் மற்றும் குஜராத் மாநிலங்கள் உள்ளன. இதில் குஜராத் மொழி இந்தி மொழிக்கு நெருக்கமான மொழி என்பதாலும் இந்தியாவிலேயே மத நம்பிக்கை மிக்கவர்களாக குஜராத்தியர்கள் இருப்பதாலும் அது இந்துத்துவாவிற்கும் இந்தித்துவாவிற்கும் ஏற்புடையவர்கள். ஆனால் குஜராத்தியர்களின் பொருளாதார மேம்பாடு இந்திய பேசுபவர்களைப் பொறாமையடையச் செய்கின்றது.  2012-ம் ஆண்டு இந்தி குஜராத்தியர்களுக்கு ஒரு அந்நிய மொழி என குஜராத் உயர் நீதி மன்றம் தீர்ப்பளித்தது. பஞ்சாப் இந்தித்துவாப் பேரினவாதிகளுடன் தனிநாட்டுப் போர் புரிந்து பெரும் பின்னடைவைச் சந்தித்துள்ளது. தமக்கு எதிராக இழைக்கப்பட்ட கொடுமைகள பஞ்சாபியர்கள் இலகுவில் மறக்க மாட்டார்கள். மும்பை மாநிலத்தில் வாழும் மராத்தியர்கள் இந்துத்துவாவுடன் இணங்கிப் போக முடியாமல் இருக்கின்றனர். ஆனால் இந்தி மொழியைக் கடுமையாக எதிர்க்கின்றனர். இந்தி மொழி பேசும் மாநிலங்களுக்கு தெற்கில் ஆந்திரா, கர்நாடகா, கேரளா தமிழ்நாடு ஆகியவை இருக்கின்றன. இவற்றில் இந்துத்துவா கொள்கைகளுக்கு கேரளாவிலும் தமிழ்நாட்டிலும் கடும் எதிர்ப்பு உண்டு. தமிழ்நாட்டிலும் கர்நாடகாவிலும் இந்தி மொழித் திணிப்பிற்கு கடும் எதிர்ப்பு உண்டு. இந்தி மொழி பேசும் மாநிலங்களுக்கு கிழக்காக மேற்கு வங்கம், பிகார், ஜார்கண்ட், ஒடிசா ஆகிய மாநிலங்கள் இருக்கின்றன. வங்காளியர்கள் இந்துத்துவாவிற்கு எதிர்ப்பையும் இந்தித்துவாவிற்கு கடும் எதிர்ப்பையும் காட்டுகின்றனர். நிலங்களால் சூழப்பட்ட இந்தி பேசும் இந்துக்கள் தமது இருப்பிற்கு துறை முகங்கள் அவசியம் என்பதையும் தமக்கென பெரும் கடற்கரைப் பிரதேசம் தேவை என்பதையும் உணர்ந்துள்ளனர். இந்தியாவின் முழுக் கடற்கரைப் பிரதேசத்தையும் நடுவண் அரசின் கட்டுப்பாட்டின் கீழ் கொண்டுவர உருவாக்கப்பட்ட திட்டம்தான் சாகர் மாலா.

ஒன்று பட முடியாத சிறுபான்மை இனங்கள்
இந்தியாவில் உள்ள இந்தி மொழி பேசாத மக்கள் ஒரு கூட்டணியாக இணைந்து செயற்பட முடியாத நிலையில் உள்ளனர். ஒரு பொதுவான தலைமை இல்லை. ஒரு பொதுவான கொள்கை அவர்களிடம் இல்லை. மாரத்தியர்களும் தமிழர்களும் ஒற்றுமையாக இல்லை. தமிழர்களும் மலையாளிகளும் ஒருவர்க்கு ஒருவர் போட்டி நிலையில் உள்ளனர். கர்நாடகாவை தமிழர்கள் வெறுக்கும் நிலை அதிகரிக்கின்றது. தெலுங்கர்களால் ஆக்கிரமிக்கப்பட்டிருப்பதாக தமிழர்கள் நினைக்கின்றனர்.  இது 41 விழுக்காடு இந்தி மொழி பேசும் மக்களுக்கு பெரும் வாய்ப்பாக அமைகின்றது. இந்தி மொழித் திரைப்படங்கள் இந்தியாவெங்கும் பிரபலம் என்பது இந்தி மொழிக்கு வலிமை சேர்க்கின்றது. 

ராகுல் காந்தியால் வலுவிழக்கும் இந்தித்துவா
காங்கிரசுக் கட்சியின் தலைமை ராகுல் காந்தியின் கையில் இருக்கும்வரை அக் கட்சி தேர்தல்களில் வெல்ல முடியாது என்ற நிலை உள்ளது. நேரு காந்தி குடும்பத்தின் கடைசித் தலைவராக ராகுல் காந்தி உருவெடுத்து வருகின்றார். காங்கிரசுக் கட்சிக்குள் ஓர் உள்ளக புரட்சி அவசியமான ஒன்றாகும். அல்லாவிடில் நேரு உருவாக்கிய இந்தித்துவா இல்லாமற் போய்விடும். இந்தித்துவா இந்துத்துவாவுடன் சங்கமமாகிவிடும்.

தற்போது உள்ள சூழலில் இந்துத்துவாவும் இந்தித்துவாவும் சிறுபான்மை இனங்களால் சவால் விட முடியாத நிலையில் உள்ளன.

Thursday, 5 April 2018

தீவிரமடையும் இணையவெளிப் போர் முனைப்பும் தாக்குதல்களும்


இணையவெளிப் போர் தொடர்பான சஞ்சிகையான C4ISRNET அமெரிக்கப் படையினர் தமது இணையவெளிப் போர் மற்றும் உளவு நடவடிக்கைகள் தொடர்பான வலுவை அதிகரித்து வருகின்றனர் எனத் தெரிவித்துள்ளது. இணையவெளிப் போர், உளவாடல், வேவுபார்த்தல், திருட்டு, பயங்கரவாத எதிர்ப்பு போன்றவற்றில் அமெரிக்கப் படையினர் அதிக கவனம் செலுத்தவிருக்கின்றனர். அமெரிக்காவின் எதிரிகள் தமது இணையவெளி நடவடிக்கைகள் தொடர்பான வலுவை அதிகரித்து வருகின்றனர் என்கின்றது C4ISRNET ஊடகம்.

இணையவெளிப்போர் பெருவல்லரசுகள்
ஐக்கிய அமெரிக்கா, சீனா, இரசியா, இஸ்ரேல், ஐக்கிய இராச்சியம் ஆகிய ஐந்து நாடுகளும் இணையவெளிப் போர் முறைமையில் பெரு வல்லரசாகக் கருதப்படுகின்றது. இவற்றிற்கு அடுத்த படியாக வட கொரியாவும் ஈரானும் இணையவெளிப் போர் முறைமையில் வலிமை மிக்க நாடுகள் எனச் சொல்லப்படுகின்றது. இணையவெளித் தாக்குதல்களால் அதிகம் பாதிக்கப்பட்ட நாடுகளாக ஐக்கிய அமெரிக்கா, ஜேர்மனி, ஜப்பான், ஐக்கிய இராச்சியம், பிரேசில், ஒஸ்ரேலியா, இரசியா ஆகிய நாடுகள் இருக்கின்றன. பிரித்தானியக் காப்புறுதி நிறுவனமான லொயிட்ஸ் இணையவெளி இழப்பீடுகள் தொடர்பாக அதிக கரிசனை கொண்டுள்ளது. ஒரு தனிப்பட்ட தாக்குதலில் 53பில்லியன் டொலர்கள் இழப்பீடு ஏற்பட்டுள்ளதாக லொயிட்ஸ் தெரிவித்துள்ளது. 2017-ம் ஆண்டு இணையவெளித் தாக்குதல்களால் ஏற்பட்ட மொத்த இழப்பு ஐந்து பில்லியன் டொலர்களாகும். அது இரு ஆண்டுகளுக்கு முன்பு ஏற்பட்ட இழப்பிலும் பார்க்க பதினைந்து மடங்காகும்.

அமெரிக்காவின் இணைய வெளிப்படைத்துறையைப் பொறுத்தவரை 2018 ஒரு திருப்பு முனையாக அமையும். அமெரிக்க ஒரு இணையவெளிக் கட்டளைப் பணியகம் ஒன்றை பல ஆண்டுகள் செய்த திட்டத்தால் உருவாக்கியுள்ளது. அதில் 133 பிரிவுகள் இருக்கும். அவற்றில் 27 தாக்குதல் அணிகளாகும். 133 பிரிவுகளிலும் 4300 படையினர் இருப்பர். 27 தாக்குதல் அணியில் 1600 படைவீரர்கள் இருப்பர். இவர்கள் வெறும் படை வீரர்கள் அல்லாமல் கணனித்துறை நிபுணர்களாக இருப்பர். இவர்கள் சீனாவின் இணைய வெளித் தாக்குதல்களை சமாளிப்பதிலும் ஈடுபடுவார்கள். அத்துடன் வட கொரியாவின் இணையவெளிப் படைப்பிரிவான Bureau 121இன் நடவடிக்கைகளுக்குப் பதில் நடவடிக்கை எடுப்பார்கள். அமெரிக்காவின் படைத் துறை இரகசியங்களை இணைய வெளி மூலம் எதிரி நாடுகள் திடுடாமல் இருப்பதற்கான பாதுகாப்பு நடவடிக்கைகளிலும் இந்த இணையவெளிப் படைப்பிரிவினர் ஈடுபடுத்தப்படுவர். அமெரிக்கா உருவாக்கும் போர் விமானம் தொடர்பான இரகசியங்களை எதிரி நாடுகள் திருடி அவற்றை அழிப்பதற்கான வழி முறைகளை சில நாட்களிலேயே உருவாக்கி விடலாம். முன்பு அப்படி ஒன்றை உருவாக்கப் பல ஆண்டுகள் எடுக்கும். அமெரிக்காவின் ஜோர்ஜியா மாநிலத்தின் ஒகஸ்டா நகரில் அமெரிக்காவின் இணைய வெளிப் படைப்பிரிவின் தலைமைச் செயலகம் அமைக்கப்பட்டுள்ளது. அங்கு ஒரு ஊடுருவிகளின் பல்கலைக் கழகமும் (hacker university) அமைக்கப்பட்டுள்ளது. அந்த இடம் Fort Gordon என அழைக்கப்படுகின்றது. அங்கு எதிரியின் கணனித் தொகுதிகளை ஊடுருவும் முறைகள் பற்றிய பயிற்ச்சி, ஆராய்ச்சி போன்றவை நடக்கின்றன. வெளியுலக இணைய வெளித் தொடர்புகள் ஏதும் இன்றி இந்தப் பல்கலைக் கழகம் செயற்படுகின்றது. அங்கு கைப்பேசிகள் கூட எடுத்துச் செல்ல முடியாது. உள்ளக தொடர்பாடல்கள் மட்டுமே பாவிக்கப் படுகின்றன. புளோரிடா மாநிலத்தில் Pensacola நகரில் உள்ள  Information Dominance என்னும் பயிற்ச்சி நிலையத்தில் ஆறுமாதங்கள் பயிற்ச்சி பெற்றுத் தேர்ச்சியடைந்தவர்கள் Fort Gordonஇல் மேலதிக பயிற்ச்சி ஒன்பது மாதங்களுக்குப் பெறுவார்கள். பின்னர் அமெரிக்காவின் பல்வேறுபட்ட படை நிலையங்களில் Cyber Analysis Course என்னும் கற்கை நெறி போதிக்கப்படும்.  ஐக்கிய அமெரிக்கா தனது படைநடவடிக்கைகளை எதிரியின் படைத்துறை இலக்குகளுக்கு மட்டும் எதிராகச் செய்ய வேண்டும் என்ற தற்கட்டுப்ப்பாட்டுடன் செயற்படுவதாகச் சொல்லிக் கொள்கின்றது.  அமெரிக்கப் படைத்துறை பல வெளிநாடுகளின் கணனிக் கட்டமைப்புக்களிற்குள் வைரசைப் புகுத்தி வைத்திருந்து தேவையான நேரங்களில் அவை அந்தக் கணனிக் கட்டமைப்பைச் செயலிழக்கச் செய்யும் ஒரு முறைமையை உருவாக்கியுள்ளது. இது வழமையான ஊடுருவல்களிலும் வேறுபட்டது. இந்த வைரசின் இருப்பைக் கண்டறிவதும் கடினம். அமெரிக்கப் படைத்துறை அமெரிக்க அதிபரின் ஒப்புதலின் பேரிலேயே இந்த வைரசுக்களை செயற்பட வைக்க முடியும்.

இணைய வெளித் தாக்குதலுக்கு பதிலடி அணுக்குண்டு
அமெரிக்க அதிபர் டொனால்ட் டிரம்பின் நிர்வாகத்தினர் தமது அணுக்குண்டு கொள்கையை 2018-ம் ஆண்டின் ஆரம்பத்தில் மீளாய்வு செய்து புதிய கொள்கையை வெளிவிட்டனர். அதில் அமெரிக்காவின் படைத்துறை மற்றும் குடிசார் வசதிகள் மீது இணையவெளித் தாக்குதல்களை எந்த நாடாவது மேற்கொண்டால் அந்த நாட்டின் மீது அமெரிக்கா அணுக்குண்டுகளை வீசும் எனத் தெரிவிக்கப்பட்டது பலரையும் ஆச்சரியப் படுத்தியது. அமெரிக்காவின் எதிரிகள் அமெரிக்க நலன்கள் மீது மேற்கொள்ளும் தாக்குதல் அந்த அளவிற்கு மோசமானதாக அமையலாம் என்பது மட்டுமல்ல அதைத் தடுக்க முடியாத நிலையில் அமெரிக்கா இருக்கின்றது என்பதால் தான் அணுக்குண்டுப் பதிலடி கொள்கையாக்கப்பட்டுள்ளது. அத்துடன் 2018-ம் ஆண்டிற்கான நிதி ஒதுக்கீட்டில் இணையவெளிப் படைத்துறைக்கு செய்யப்பட்ட ஒதுக்கீட்டு அதிகரிப்பு மற்றத்துறைகளுக்குச் செய்த அதிகரிப்பிலும் பார்க அதிகமாகும்.

அமெரிக்கத் தேர்தலில் மீண்டும் இணையவெளித் தலையீடு?
2018 நவம்பரில் அமெரிக்காவின் பாராளமன்றத்தின் மக்களவைக்கான முழு உறுப்பினர்களும் மூதவக்கான மொத்த 100 உறுப்பினர்களில் 34 உறுப்பினர்களும் தேர்தல் மூலம் தேர்ந்தெடுக்கப்படவிருக்கின்றார்கள். அதற்கான பரப்புரை மும்முரமாக நடக்கும் வேளையில் ரெட்டிற் என்னும் இன்னும் ஒரு சமூக வலைத்தளம் 2016-ம் ஆண்டு நவம்பரில் நடந்த அமெரிக்க அதிபர் தேர்தலில் தாக்கத்தை உண்டாக்கக் கூடிய வகையில் தமது தளத்தை இரசியர்கள் பாவித்தார்கள் என ஒத்துக் கொண்டுள்ளது. கண்டறிவதற்கும் நீக்குவதற்கும் கடினமான வகையில் தமது பாவனையாளர்கள் மறைமுகமாகச் செயற்பட்டதால ரெட்டிற் அறிவித்துள்ளது. 2018 நவம்பர் நடக்கவிருக்கும் தேர்தலில் இரசியா தலையிடுமா என்ற கரிசனை அமெரிக்காவில் தீவிரமடைகின்றது. தேர்தலில் இரசியா தலையிடாமல் தான் பார்த்துக் கொள்வேன் என 2016 தேர்தலில் இரசியத் தலையீட்டை போலிச் செய்தி என அடிக்கடி சொல்லிவரும் அமெரிக்க அதிபர் டொனால் டிரமப் பகிரங்கமாக அறிவித்துள்ளார். உலகெங்கும் நடக்கும் தேர்தல்களில் நேரடியாகவும் மறைமுகமாகவும் தலையிட்டு தனக்குச் சாதகமாக தேர்தல் முடிவுகளை மாற்றக் கூடிய அமெரிக்காவின் தேர்தல் முடிவை அதன் எதிரி நாடு மாற்றியதா என்ற கேள்வி அமெரிக்கர்கள் மத்தியில் விசனத்தை உண்டாக்கியுள்ளது.

அமெரிக்கப் படைகளுக்கு பொது மென்பொருள்
உலகெங்கும் உள்ள அமெரிக்கப் படைகள் உளவுத் துறைத் தகவல்களை திரட்டவும் பகிர்ந்து கொள்ளவும் என அமெரிக்கப் படைத்துறை நிறுவனமான Raytheon ஒரு பொதுவான மென்பொருளை உருவாக்கியுள்ளது. அதைச் செயற்படுத்த Distributed Common Ground System-Army என்னும் பெயரில் ஒரு தனிப் படைப்பிரிவு உருவாக்கப் பட்டுள்ளது. இத் திட்டத்தை கடந்த பத்து ஆண்டுகளாக Raytheon உருவாக்கியுள்ளது. அடுத்த இருபது ஆண்டுகளில் இதற்கு 28 பில்லியன் டொலர்கள் செலவிடப்படவுள்ளது.

சீனாவும் இணையவெளியும்
2015-ம் ஆண்டு சீனா வெளியிட்ட “சீனாவின் படைத்துறை கேந்திரோபாயம்” என்ற வெள்ளை அறிக்கையில்:
இணையவெளி பொருளாதார மற்றும் சமூக அபிவிருத்தியின் தூணாக அமைந்துள்ளதுடன் தேசிய பாதுகப்பிற்கான ஒரு புதிய திரளமாகவும் (domain) திகழ்கின்றது. படைத்துறைப் பாதுகாப்பில் இணையவெளியின் வகிபாகம் அதிகரிப்பதால் சீனா தனது இணையவெளிப் படைப்பிரிவின் உருவாக்ககம், இணையவெளிப் பாதுகாப்பு ஆகியவற்றைத் துரிதப்படுத்தவிருக்கின்றது.

பல நாடுகள் மீது 2017-ம் ஆண்டு செய்யப்பட்ட WannaCry ransomware தாக்குதலால் சீனாவே அதிக பாதிப்படைந்தது. 649மில்லியன் சீனர்கள் இணையவெளியைப் பாவிப்பதால் சீனா தானே இணையவெளியின் பெருவல்லரசு எனச் சொல்கின்றது. FireEye என்னும் நிறுவனத்தின் iSite என்னும் பிரிவு உலகெங்கும் நடக்கும் இணையவெளித்தாக்குதல்களை ஆய்வு செய்து ஆலோசனையை வழங்குகின்றது. அதன் அறிக்கியின் படி சீனாவில் இருந்து செய்யப்படும் இணையவெளித் தாக்குதல்களின் எண்ணிக்கை குறைந்துள்ள வேளையில் அங்கிருந்து செய்யப்படும் தாக்குதல்களின் தொழில்நுட்பத்தரம் மிகவும் உயர்துள்ளது. அமெரிக்கா போல் தனிமனித தொடர்பாடல் உரிமை, தனிமனித அந்தரங்கம் போன்றவற்றிற்கு சீனா மதிப்புக் கொடுக்காமல் தன் இணையவெளிப் போர் முறைமையை உருவாக்கியுள்ளது என ஒரு ஜப்பானிய ஊடகம் குற்றம் சுமத்தியுள்ளது. சீனாவில் இஸ்லாமியர்கள் இறைச்சி வெட்டும் கத்தியை வாங்கும் போது அதில் வாங்குபவர் தொடர்பான தகவல்கள் அதில் இலத்திரனியல் ரீதியில் பதிவு செய்யபப்டும். அக்கத்தி மூலம் ஏதாவது குற்றச் செயல்கள் நடந்தால் அதைக் கண்டு பிடிக்க இப்படி ஏற்பாடு செய்யப்படுகின்றது. இது இஸ்லாமியப் பிரிவினைவாதம் தலைதூக்கியுள்ள உய்குர் மாகாணத்தில் தீவிரமாக நடைமுறைப்படுத்தப் படுகின்றது. அந்த மாகாணத்தில் எல்லோரின் முகங்களினதும் படங்கள் பதிவு செய்யப்பட்டு அவர்களின் தகவர்கள் அத்துடன் இணைக்கப்பட்டு கணினிகளில் அவை திரட்டி வைக்கப்படுகின்றன. இது முழு சீனாவிற்கும் விரிவு படுத்தப்படவிருக்கின்றது. சீன மக்களின் சமூகவலைத் தளங்களைக் கண்காணிப்பதற்கு சீன அரசு ஒரு இலட்சம் பேரை பணிக்கு அமர்த்தியுள்ளது.

அமெரிக்க சமூகவலைத்தளங்கள் சீனாவின் இறைமைக்கு அச்சுறுத்தல் என்பதால் இணையவெளி இறையாண்மையில் சீனா அதிக கவனம் செலுத்துகின்றது. இணையவெளி ஒத்துழைப்பைப் பற்றி அதிகம் பேசும் அமெரிக்கா சீனாவின் உறுதிப்பாட்டைக் குலைக்கக் கூடியவகையில் பல இணையவெளி உத்திகளை புதிது புதிதாக உருவாக்கிக் கொண்டிருக்கின்றது எனச் சீனா குற்றம் சாட்டுகின்றது. அமெரிக்காவில் இருந்து சீனா மீது மாதம் தோறும் பத்தாயிரங்கள் என்ற எண்ணிக்கையில் தாக்குதல் நடத்தப்படுவதாக சீனா குற்றம் சாட்டுகின்றது. ஆனால் சீனாவில் இருந்து ஆண்டு தோறும் பத்து மில்லியன்களுக்கு மேற்பட்ட இணையவெளித் தாக்குதல்கள் நடப்பதாக அமெரிக்கா குற்றம் சாட்டுகின்றது.

Monday, 5 March 2018

ஆசிய முதலீட்டுப் பசியும் சீன ஆதிக்க வெறியும்


சீனா அமெரிக்கா போல் உலகை சுரண்டும் ஒரு நாடாக உருவெடுக்காமல் அதன் உள்ளகப் பிரச்சனைகளைத் தீர்க்க முடியாது. ஏற்றுமதில் பெரிதும் தங்கியிருக்கும் சீனப் பொருளாதாரம் 2008இன் பின்னர் உலகப் பொருளாதார மந்தத்தால் பாதிக்கப்பட்டது. 2016இன் பின்னர் மேற்கு நாடுகளில் தீவிரம் பெற்ற தேசியவாதத்தால் பாதிப்புக்களைச் சந்திக்கப் போகின்றது. சீனா உலகச் சந்தையில் தனது பொருட்களை மலிவாக விற்பனை செய்வது பல முனைகளைல் சவால்களை எதிர் நோக்குகின்றது. அமெரிக்கா முதன்மையானது என்ற டிரம்பின் கொள்கை, இந்தியாவில் செய்யுங்கள் என்ற மோடியின் கொள்கை, ஐரோப்பிய ஒன்றிய நாடுகளின் கடன் பிரச்சனை போன்றவை சீனாவின் ஏற்றுமதியில் பாதிப்பை ஏற்படுத்தும்.


1797 முதல் 1801 வரை அமெரிக்க அதிபராக இருந்த ஜோன் அடம்ஸ் ஒரு நாட்டை வாள் கொண்டும் ஆக்கிரமிக்கலாம் கடன் கொடுத்தும் ஆக்கிரமிக்கலாம். சீனா இரண்டாவது வழியைக் கையாள்கின்றது எனறார் இந்திய ஆய்வாளர் பிரம்மா செல்லனி. தென் சீனக் கடலில் தன்னுடம் முரண்டு பிடித்துக் கொண்டிருந்த பிலிப்பைன்ஸை சீனா அங்கிருந்து இறக்குமதி செய்யும் வாழைப்பழத்திற்கு மருத்துவக் காரணங்களைக் காட்டி தடை செய்தது. அதனால் பிலிப்பைன்ஸ் சீனாவின் வழிக்குப் போனது. மாலை தீவின் பல தீவுகளை சீனா கடன் கொடுத்தே தன்வசமாக்கியது.

சீனாவை மையப்படுத்திய அமெரிக்க இந்தியக் கொள்கைகள்
இந்த நூற்றாண்டில் ஆசிய நாடுகள் உலகப் பொருளாதாரத்தில் பெரும் பங்கை வகிக்கப் போகின்றன என்பதை உணர்ந்த அமெரிக்கா ஆசியாவை தனது சுழற்ச்சி மையமாக அறிவித்தது. தனது படை வலிமையையும் ஆசியாவில் அதிகரித்தது. இந்தியாவும் ஆசியப் பொருளாதார வளர்ச்சியையும் அதில் சீனாவின் ஆதிக்கத்தையும் கருத்தில் கொண்டு கிழக்கு நோக்கிய நகர்வு என்ற கொள்கையை வகுத்தது. 2017 டிசம்பரில் வெளிவிடப்பட்ட அமெரிக்காவின் தேசிய பாதுகாப்புக் கேந்திரோபாயத்தில் சீனாவும் இரசியாவும் அமெரிக்க அதிகாரத்திற்கும் நலன்களுக்கும் சவாலாக இருக்கின்றன. அவை அமெரிக்காவின் செழிமையையும் பாதுகாப்பையும் அழிக்க முயல்கின்றன எனத் தெரிவிக்கப்பட்டுள்ளது.

ஆசிய முதலீட்டுப்பசியும் சீன வேலைப்பசியும்
ஆசிய நாடுகளில் பொருளாதார அபிவிருத்தியைத் தொடர்ந்து பேணுவதற்கும் வறுமைய ஒழிப்பதற்கும் கால நிலை மாற்றங்களை சரியாக எதிர் கொள்வதற்கும் ஆண்டொன்றிற்கு 1.7ரில்லியன் டொலர்கள் பெறுமதியான முதலீடு தேவைப்படும். எரிபொருள் உற்பத்திக்கும் தெருக்களை அபிவிருத்தி செய்வதற்கும் அடுத்த பத்து ஆண்டுகளுக்கு 8.4ரில்லியன் டொலர்கள் தேவைப்படும். ஆசிய நாடுகளில் செய்யப்படும் உட்கட்டுமான முதலீடுகளுக்கும் செய்யத் அதற்காக செலவழிக்க வேண்டிய தொகைக்கும் இடையில் பெரும் இடைவெளி உள்ளது. அது அந்த நாடுகளின் மொத்தப் பொருளாதார உற்பத்தியில் 2.4விழுக்காடாக உள்ளது. சீனாவின் பொருளாதார வளர்ச்சி எதிர் கொள்ளும் சவால் அதன் ஏற்றுமதிக்கு உலகெங்கும் உருவாகும் எதிர்ப்பு மட்டுமல்ல அதன் மக்கள் தொகைக் கட்டமைப்புமாகும். சீனாவின் வயோதிபர் தொகை அதிகரித்துக் கொண்டும் இளையோர் தொகை குறைந்து கொண்டும் போகின்றது. இளம் பெண்களுக்கு சீனாவில் பெரும் தட்டுப்பாடு நிலவுகின்றது. இது சீனாவின் மக்கள் தொகைக் கட்டமைப்பை மேலும் மோசமாக்குகின்றதுஜிபுக்தியில் சீனா தளம் அமைத்ததும் அவ்வாறே.

கட்டுக்கடங்கா உட்கட்டுமானத் தேவைகள்
உட்கட்டுமான அபிவிருத்திக்கும் சமூக நலன்களுக்கும்  2040-ம் ஆண்டு வரை இந்தியாவிற்கு 4.5ரில்லியன் டொலர்கள் தேவைப்படும் என மதிப்பிடப்பட்டுள்ளது. இதில் 3.9ரில்லியன் டொலர்களை மட்டும் இந்தியாவால் சமாளிக்க முடியும் என்பதால் 526பில்லியன் டொலர்கள் குறையாக உள்ளது. பல வெளிநாட்டு நிறுவனங்கள் இந்தியாவில் முதலீடு செய்யத் தயங்குவதற்கு இந்தியாவின் உள்கட்டுமானங்களில் உள்ள குறைபாடே காரணமாகும். இனிவரும் ஆண்டுகளில் இந்தியாவின் எரிபொருள் தேவை மூன்று அல்லது நான்கு மடங்காக அதிகரிக்கவிருக்கின்றது. அருணாச்சல் பிரதேசம், அசாம், மணிப்புரி, மெகலாயா, மிசோரம், நாகலாந்து, சிக்கிம் ஆகிய இந்தியாவின் வட கிழக்கு மாநிலங்களில் அசாம் வறுமை மிக்க மாநிலமாகும். இந்த வட கிழக்கு மாநிலங்களின் மொத்த மக்கள் தொகையில் அசாமின் மக்கள் தொகை வட கிழக்கு மாநிலங்களின் மொத்த மக்கள் தொகையின் மூன்றில் இரண்டு பங்காகும். இந்தியாவின் சராசரி வருமானத்தின் அரைப்பங்குதான் அசாம் மக்களின் வருமானமாகும். அசாம் மிகப் பின்தங்கிய உட்கட்டுமானம் கொண்ட ஒரு மாநிலமாக இருப்பதே அதன் வறிய நிலைக்குக் காரணமாகச் சுட்டிக் காட்டப்படுகின்றது. ஆசிய நாட்டின் உட்கட்டுமானத் தேவைக்கும் அதன் வறுமைக்கும் இடையில் உள்ள தொடர்புக்கு அசாம் மாநிலம் சிறந்த உதாரணமாகும். இந்தியாவின் வட கிழக்கு நகரான மணிப்பூரில் இருந்து மியன்மார் ஊடாக பாங்கொக் வரை ஒரு 1980கிமீ நீண்ட தெரு அமைக்கும் திட்டம் வட கிழக்கு மாநிலங்களுக்கு பெரிய நன்மைகளைக் கொண்டு வரப்போவதில்லை.

கட்டுமான வங்கிகள்
2016-ம் ஆண்டு சீனா ஆரம்பித்த ஆசிய உட்கட்டுமான முதலீட்டு வங்கியில் சீனாவிற்கு அடுத்த படியாக அதிக முதலீட்டை இந்தியா செய்துள்ளது. அது இந்தியாவிற்கு ஒரு பில்லியன் டொலர் கடனை அனுமதிந்துள்ளது மேலும் ஒரு பில்லியன் கடனை வழங்கவும் உள்ளது. இந்தியாவைப் பொறுத்த வரை இது ஆனைப் பசிக்கு சோழப் பொரி போன்றது. ஆசியான் நாடுகளின் மொத்த பொருளாதார உற்பத்தி உலகின் ஏழாவது பெரிய உற்பத்தியாகும். உலகின் முன்னணி நிறுவனங்களில் 230 ஆசியான் நாடுகளைச் சேர்ந்தவை. ஆசியான் நாடுகள் சீனாவை மிகவும் கவனமாகக் கையாளுகின்றன. ஆசிய உட்கட்டுமான முதலீட்டு வங்கி சீனாவின் பட்டுப்பாதைத் திட்டத்திலும் முதலீடு செய்யவுள்ளது என அதன் தலைவர் டாவோஸ் மாநாட்டில் தெரிவித்துள்ளார்.


சீனாவின் உட்கட்டுமான மிகைக் கொள்ளளவு (Excess Capacity)
1980களில் இருந்து சீனா தனது உட்கட்டுமான அபிவிருத்தியை அசுர வேகத்தில் செய்து வந்தது. 2008-ம் ஆண்டு உருவான உலகப் பொருளாதார நெருக்கடியைத் தொடர்ந்து சீனா தனது பொருளாதார வளர்ச்சியைத் தக்க வைக்க அரச செலவீனங்களை அதிகரித்தது. உள்ளூராட்சி சபைகளுக்கு அரச வங்கிகள் கடன்களை வழங்கி பல உட்கட்டுமான முதலீடுகள் செய்யப்பட்டன. இது தேவைக்கு அதிகமான உட்கட்டுமானத்தில் முடிந்தது. இதனால் சீனாவின் கைகளில் உட்கட்டுமானங்களுத் தேவையான உற்பத்திச் சாதனங்கள் நிறைய் உள்ளன. இவற்றை உள்நாட்டில் பாவிக்க முடியாத நிலையில் அவற்றை வெளிநாட்டில் சீனா பாவிக்கத் தொடங்கியது. அதன் விளைவுகள் பலவற்றை இலங்கையில் அதிலும் முக்கியமாக அம்பாந்தோட்டையில் நாம் பார்க்கலாம். அம்பாந்தோட்டையில் சீனா உருவாக்கியவை வர்த்தக ரீதியில் இலாபம் தரக்கூடியவை அல்ல. ஆனால் அவை இலங்கையின் கடன் பளுவை அதிகரித்தன. இதனால் சீனாவின் ஆதிக்கத்துக்குள் இலங்கையை கொண்டுவர சீனா முயற்ச்சித்ததாகச் சொல்லப்படுகின்றது.

பாவிக்க முடியாதவற்றை பாவித்துக் கடன் கொடுக்கும் சீனா
தனது உள்நாட்டில் மிகையாக இருக்கும் உற்பத்திச் சாதனங்களை வளரும் நாடுகளில் பாவித்து அங்கு பல உட்கட்டுமானங்களை சீனா உருவாக்குகின்றது. அந்த உள்நாட்டில் பாவிக்காமல் இருக்கும் உற்பத்திச் சாதனங்களை வெளிநாடுகளில் பாவிப்பதற்கான கட்டணங்கள் அந்த நாடுகளுக்கு அதிக வட்டி கொண்ட கடன்களாக கடுமையான நிபந்தனைகளைக் கொண்ட ஒப்பந்தகள் மூலம் கடன்களாக்கப் படுகின்றன. பல நாடுகளில் அயோக்கிய ஆட்சியாளர்கள் இதற்கு உடன்படுகின்றார்கள். அந்த ஆட்சியாளர்கள் சீனாவின் உட்கட்டுமானத் திட்டங்களின் உள்நாட்டு உப-வேலைகளில் ஊழல்கள் செய்து பெரும் பணம் சம்பாதிக்கின்றனர். சீனாவின் இந்த உட்கட்டுமானம் மூலம் ஒரு நாட்டுக்குள் தன் ஆதிக்கத்தைச் செலுத்தும் முயற்ச்சியை கடன்பொறி அரசுறவியல் (Debt trap diplomacy) என விமர்சிக்கப்படுகின்றது அம்பாந்தோட்டையில் சீனா உருவாக்கிய  விமான நிலையம் “the emptiest airport in the world” என பல மேற்குலக ஊடகங்கள் பரப்புரை செய்தன. சீனாவின் கடன்பொறி அரசுறவியலை உலகிற்கு அம்பலப்படுத்த அவை இலங்கையை உதாரணமாகக் காட்டுகின்றன.

துயிலெழுந்த ஒஸ்ரேலியா
ஜப்பான் படைத்துறை ரீதியில் அமெரிக்காவுடனும் இந்தியாவுடனும் சீனாவிற்கு எதிராக ஒரு மூவர் கூட்டணி அமைக்க முயலுகையில் ஒஸ்ரேலியா சீனாவின் கடன்பொறி அரசுறவியலுக்கு எதிராக இந்தியா, அமெரிக்கா, ஜப்பான் ஆகிய நாடுகளுடன் இணைந்து ஒரு நால்வரணியை அமைக்க விரும்புகின்றது. ஆசிய பசுபிக் பிராந்தியத்தில் உள்ள நாடுகளின் உட்கட்டுமானப் பசிக்கு சீனா இரை போட்டு அவற்றைத் தன்வசமாக்குவதற்கு எதிராக இந்த நால்வரணி செயற்பட வேண்டும் என்பது ஒஸ்ரேலியாவின் திட்டமாகும். ஒஸ்ரேலியாவின் திட்டம் தொடர்பாகக் கருத்து வெளியிட்ட புதுடில்லியிலுள்ள கொள்கை ஆய்வு மையத்தின் பேராசிரியர் பிரம்மா செல்லனி கருத்து வெளியிடுகையில் ஒஸ்ரேலியா காலம் தாழ்த்தி துயிலெழுந்துள்ளது என்றார். அவர் சீனாவின் செய்கைக்கு கடன்கார ஏகாதிபத்தியவாதம் என்கின்றார். ஒஸ்ரேலியா ஏற்கனவே தனது துறைமுகமொன்றை சீனாவிற்கு 99 ஆண்டுகள் குத்தகைக்கும் விட்டுள்ளது.

வல்லரசுக் கனவு
தனது பட்டு மற்றும் பீங்கான் ஏற்றுமதி மூலம் ஆயிரம் ஆண்டுகளுக்கு முன்னர் உலகின் மிகச் செல்வந்த நாடாக இருந்த சீனாவே உலகின் முதல் துப்பாக்கி பொருத்திய கப்பலை உருவாக்கியது. அதைக் கொண்டு அது பல உலக நாடுகளை ஆக்கிரமித்து ஓர் ஏகாதிபத்திய நாடாக மாறாமல் விட்டதை இனிச் செய்ய சீனா முயல்கின்றது என்ற குற்றச் சாட்டு இப்போது முன்வைக்கப்படுகின்றது. தற்போது உள்ள நிலவரப்படி 2032-ம் ஆண்டு சீனா உலகின் மிகப்பெரிய பொருளாதார நாடாக உருவாகும் என எதிர்பார்க்கப் படுகின்றது. பத்தொன்பதாம் நூற்றாண்டில் பிரித்தானியா தனது உலக ஆதிக்கத்தை உருவாக்கக் கையாண்ட உத்திகளையும் இருபதாம் நூற்றாண்டில் ஐக்கிய அமெரிக்கா தனது உலக ஆதிக்கத்தை நிலைநிறுத்த கையாண்ட உபாயங்களையும் கலந்து பாவிக்க சீனா முயல்கின்றது. இந்த இரு வல்லரசுகளின் உலக ஆதிக்கத்திற்கு அவற்றின் கடற்படையும் அவற்றின் குடியேற்ற ஆட்சிக்கு உட்பட்ட நாடுகளும், புதிய-குடியேற்ற ஆட்சி நாடுகளும் காரணமாகும். அவை செய்தவற்றை சீனா தனது கடன்பொறி அரசுறவியல் மூலம் நிலைநிறுத்த முயல்கின்றது. சீனாவின் கடல்வழிப் பட்டுப்பாதை, தரைவழிப்பட்டுப்பாதை, துருவப் பட்டுப்பாதை ஆகிய திட்டங்களும் அவற்றை ஒட்டிய பொருளாதாரப் பட்டிகளும் (Economy Belts) உலகெங்கும் அதனது கடன்பொறி அரசுறவியலின் வேறு வடிவங்களே. பல நாடுகளில் சீனா செய்யும் உட்கட்டுமான முதலீடுகளில் சீனாவின் படையினர் பணிக்கு அமர்த்தப்படுகின்றனர். பலர் அங்கு நிரந்தரமாகத் தங்க வைக்கப்பட்டும் உள்ளனர். சீனாவின் நீண்டகாலத் தண்டனை பெற்ற குற்றவாளிகளும் சீனாவின் சிறைச்சாலை நெருக்கடிகளைத் தவிர்க்க இந்த உட்கட்டுமான முதலீடுகளில் தொழிலாளர்களாக பணிபுரிய வைக்கப்படுகின்றனர். வ்

நிரந்தரத் தலைமை
தொடர்ந்து முப்பது ஆண்டுகளுக்கு மேல் சிறந்த பொருளாதார வளர்ச்சியைக் கண்ட சீனாவில் இனி பொருளாதார வளர்ச்சி வேகம் குறையும் என எதிர்பார்க்கப்படுகின்றது. இதனால் பல உள்நாட்டுப் பிரச்சனைகளையும் சீனா எதிர் கொள்ள வேண்டி வரும். அதை எல்லாம் சமாளித்து சீனாவை ஓர் உலகப் பெரு வல்லரசாக்க உறுதி மிக்க தலைமை தேவை என சீனாவின் பொதுவுடமைக்கட்சி உணர்ந்துள்ளது. அதன் முன்னணித் தலைவர்கள் பலர் சீனாவின் உறுதி மிக்க தலைமையை ஷி ஜின்பிங்கால் மட்டுமே வழங்க முடியும் என்பதால் சீன அதிபர் இரண்டு தடவைக்கு மேல் பதவி வகிக்க முடியாது என அரசியலமைப்பில் இருப்பதை மாற்றி ஷி ஜின்பிங் தொடர்ந்து பதவி வகிக்க வேண்டும் என முடிவெடுத்துள்ளன. தென் சீனக் கடலில் ஷி ஜின்பிங்கின் உறுதியான நிலைப்பாட்டை அவர்கள் பெரிதும் மதிக்கின்றனர்

21-ம் நூற்றாண்டை இந்து மாக்க்கடலுக்கும் பசுபிக் மாக்கடலுக்கும் இடையில் உள்ள நாடுகள் தீர்மானிக்கப் போகின்றன. அந்த நாடுகளிடையே இல்லாத ஒற்றுமையில் அமெரிக்கா குளிர்காயப் போகின்றது.

Featured post

உலக கடலாதிக்கப் போட்டியில் விமானம் தாங்கிக் கப்பல்கள்

விமானம் தாங்கிக் கப்பல்கள்  என்பன பல போர்விமானங்கள் நிறுத்தக் கூடிய பாதுகாப்பான இடத்தையும் அவை பறக்கக் கூடிய ஓடுபாதையையும் கொண்டிருக்கும்...